Sos trasportos dae e pro sa Sardigna sunt cambiende. Alitalia est tanchende pro abèrrere una cumpannias noa prus minore, ITA, e eris iscadiat su bandu nou pro sa continuidade territoriale pro sa trata navale Portu Turre – Gènova, ma nen CIN-Tirrenia, nen Grimaldi bi cheriant partetzipare. Ite cherent nàrrere acuntessimentos de custa genia?
Eris su Presidente Solinas at faeddadu cun Draghi de su benidore de s’ìsula. No est istada una cosa gasi longa, deghe minutos, ma narant chi est bastadu pro isòrvere tres problemas mannos e antigos de Sardigna: trasportos, infrastruturas e energia. De sa prima chistione Draghi at naradu chi si podet isòrvere cun una cumpannia sarda, comente in Còrsica, ponende in paris sos aèreos de Alitalia chi non serbint prus e sos traballadores de AirItaly. Su dinari b’est, e sa voluntade paret su matessi.
Si su bandu pro sos agiudos de Istadu pro sa trata Portu Turre – Gènova dae atòngiu a beranu est andadu bòidu, diat chèrrere nàrrere chi cussu biàgiu est profetosu meda pro sas cumpannias, gasi meda chi podent fàghere de mancu de su dinari de su bandu, fintzas si sunt cun pagos òbligos: a sa revessa de su chi est capitadu pro sa Civitavècchia-Arbatassa-Casteddu. Custas medidas de agiudu sunt cambiende, ma sena annànghere nudda de saliosu pro sas cumpannias, antzis forsis sunt peorende puru. S’àtera cosa est chi chie ammanìgiat sos navios non cheret mancu s’intesa de tènnere ligàmenes prus o mancu istrintos. Lìberos de su totu, est gasi chi si cherent. Ma ite at a capitare in custa libertade?
Calicunu narat chi gasi si mènguant sas garantzias pro sos biagiadores sardos chi, in custa manera, no ant a tènnere un’agiudu pro andare a Itàlia o ghirare a domo, mescamente in ierru chi sena turistas su biàgiu costa meda a chie l’ammanìgiat. Calicunu, a s’imbesse, narat chi gasi su mercadu at a agatare un’echilìbriu dae isse etotu, ca sas cumpannias s’ant a fàghere sa gherra intre issas e a bi balangiare amus a èssere nois sardos. Però sa cuncurrèntzia no est gasi manna e s’arriscu est chi sas pagas aziendas chi b’at, potzant agatare un’acordu pro non si infadare tropu e a bi pèrdere amus a èssere nois.
Su chi est craru a totus, e non dae como, est chi sos trasportos in Sardigna sunt regulados male, sos sardos tenent unu muntone de istorbos a si nche mòvere dae e pro s’ìsula e chi sa continuidade territoriale, gasi comente est, non serbit a nemos. Ma como b’at Draghi chi in deghe minutos at a isòrvere totus.
(redatzione)
Leave a comment