Sa biodiversidade in sa terminologia de sa vida

Dae pagu su  TERMCAT at presentadu su “Portal Vida”, dedicadu a sa terminologia de sas sièntzias de sa vida. Unu de sos tèrmines prus interessantes est “biodiversitat” (in sardu “biodiversidade”). Si referit a sa variedade de sa vida in totu sas formas, grados e cumbinatziones suas, contende finas sa diversidade de ecosistemas, sa diversidade de ispètzies  e sa diversidade genètica.

Si tratat de unu tèrmine de formatzione culta, in ue  su prefissu “bio”, chi benit dae su gregu e cheret nàrrere ‘vida’, s’annanghet a sa  base “diversitat”, chi benit dae su latinu e si referit a sa ‘calidade de diversu’ o a sa ‘multitùdine de cosas diversas’. Sa formatzione, duncas, resurtat trasparente dae su puntu de vista semànticu.    Dae sos annos  80 de su sèculu coladu custu tèrmine at isperimentadu un’estensione de usu notàbile, in currespondèntzia cun sa cussèntzia  semper prus manna de sa netzessidade de preservare sa biodiversidade in totu sos campos.

Sa biodiversidade est un’elementu fundamentale chi cuntribuit a un’echilìbriu armònicu de sos tziclos  terrestres de s’abba, de  s‘ossìgenu, de s’energia de su sole e de sa biomassa. Paret chi unu de sos efetos prus mannos  de su caentòngiu globale e de su càmbiu climàticu siat pròpiu sa pèrdida de biodiversidade.

sa redatzione