Sa bandera de su Mediterràneu imbiada a sos cabos de istadu de s'àrea

“Progetto Mediterranea” est su nùmene de un’assòtziu nàschidu su 2019 comente agregadore culturale pro collire progetos de diàlogu intre sos pòpulos. Su 30 de làmpadas de s’annu coladu, a pustis de àere valutadu sos 1002 disegnos de chie pigheit parte a s’initziativa ideada dae s’iscritore Simone Perotti, una cummissione de gràficos, fotògrafos, poetas e tzitadinos at seberadu sa bandera de su Mediteràneu. Disegnada dae Salvatore Scollo, Hushmand Toulian e Guglielmo Persano (tres istudiantes sitzilianos) e cun un’àrbore in intro de unu sole, como custa bandera nch’est lòmpida a 30 personalidades intre cabos de istadu e guvernadores de s’àrea: Albania, Algeria, Bòsnia-Erzegòvina, Bulgaria, Croàtzia, Egitu, Frantza, Gibilterra, Giordània, Geòrgia, Grètzia, Islovènia, Ispagna, Israele, Italia, Lìbanu, Lìbia, Malta, Marocu, Mònacu, Montenegru, Palestina, Portugallu, Romania, Rùssia, Tunisia, Turchia, Tzipru, Ucraina, Vaticanu. Sa bandera l’ant retzida finamentas sos presidentes europeos de su Parlamentu, de sa Cummissione e de su Consìgiu (redatzione).