S’Acadèmia Valentziana de sa Limba (AVL) e su Tzentru de Terminologia TERMCAT ant rennovadu s’acordu de collaboratzione chi los ligat dae su mese de maju de su 2016. S’acordu, firmadu dae sa presidenta de s’AVL, Verònica Cantó, e dae Jordi Bover, diretore de su TERMCAT, previdet su cuncàmbiu de informatziones subra de sos progetos terminològicos e s’istabilimentu de mecanismos pro assegurare sa difusione de critèrios comunos pro bogare a campu sos tèrmines noos.
S’idea est a megiorare sa relatzione intre sos duos organismos pro collaborare in s’isvilupu de sa terminologia in sos campos diferentes de sa connoschèntzia. Frutu de sa collaboratzione est chi ocannu su TERMCAT at insertadu in su chircadore terminològicu de consulta pùblica, su Cercaterm, 942 ischedas chi benint dae su Portale Terminològicu Valentzianu. Sas ischedas tzedidas agiuant a fàghere aumentare su flussu terminològicu in campos temàticos de interessu mannu pro sos impitadores, comente s’alimentatzione, sa gastronomia, s’isport o sa mùsica. Gasi etotu, in su 2022, sas duas entidades ant coeditadu s’agiornamentu de su “Diccionari de lingüística”, cuidadu dae Manuel Pérez Saldanya cun s’agiudu de Rosanna Mestre e Ofèlia Sanmartín, cun prus de 3.500 intradas chi pertocant sa terminologia generada dae sas iscolas e teorias printzipales chi ant afrontadu s’istùdiu de su limbàgiu umanu, dae sa grammàtica traditzionale finas a sas tendèntzias linguìsticas prus atuales.
(sa redatzione)
Leave a comment