Sa pelea de s’apaltu pro sa limba sarda in Cabuterra agiunghet unu capìtulu nou a una briga polìtica chi non sessat. Christian Ruju, cussigeri comunale de Cabuterra, no est abbarradu frimmu cando ant intesu sa nova de s’annullamentu de s’apaltu comunale de s‘ufìtziu limba sarda giai agiudicadu a Sarda Itinera Onlus. At presentadu un’interpellàntzia. Segundu Ruju, chi de custa chistione nd’at fatu una batalla polìtica verdadera, est semper curpa de sa gestione polìtica de su partidu Rossomori.
<Apo a gherrare pro chi Cabuterra – at iscritu in una declaratzione su cussigeri – si nde liberet dae su giuale de su grupu polìticu chi at aministradu dae deghènnios sa cultura, sa limba e sas traditziones faghende dannu finas a s’identidade de sa bidda>.
Unu pensamentu ladinu chi faghet pensare deretu a sa chistione chi Su Tar Sardegna at annulladu sa gara de apaltu de agiudicatzione de s’ufìtziu de sa limba sarda de Cabuterra. Su Tribunale Amministrativu Regionale at acasagiadu su ricursu de s’assòtziu Sa Bertula Antiga e annulladu sa determinatzione cun sa cale su comune aiat declaradu binchidora sa ditta Sarda Itìnera Onlus de Stefano Meloni. Siat su comunu chi Sarda Itìnera sunt istados cundennados a pagare € 2500 èuros peròmine de gastos legales.
Pro Ruju custu est unu dannu a sa comunidade non si cumprendet fatu pro ite. “Pro primu penso chi sa sentèntzia non depat pesare a subra de sos tzitadinos, ma penso chi depat èssere pagada dae su livellu amministrativu, ca a livellu polìticu aiai giai denuntziadu sas irregolaridades “. Su comunu, in sa protzedura de afidamentu de s’apaltu, aiat reconnotu a Sarda Itìnera elementos de capatzidade tècnicu-professionale chi non li pertocaiant. Difatis, su bandu prevediat chi, in sos annos, 2012-15 sa sotziedade depiat àere giai gestidu nessi 7 progetos. In tamen su Tribunale Amministrativu Regionale at tzensuradu Sarda Itinera ca in sa declaratzione fata dae s’assòtziu chi pertocaiat <su de àere gestidu contemporaneamente sete ufìtzios de sa limba sarda> no est istada capatza de lu proare.
In s’oferta de Sarda Itinera Onlus si atestat finas chi at gestidu 10 isportellos. Gasi chi, comente in tamen resurtat in sos atos, sos ufìtzios gestidos sunt petzi 6. S’oferta de Sarda Itinera Onlus, pro su comune, at bintu e depiat in tamen èssere escluida pro difetu e farta de sos rechisidos de capatzidade tècnica e professionale rechestos dae su matessi bandu de gara fatu dae s’amministratzione.
Tando s’assessore de sa limba fiat Salvatore Lai, semper de su partidu Rossomori. Como b’at un’àtera persone e s’at a bìdere ite at a detzìdere.
Como tocat a s’amministratzione comunale de dare atuatzione a sa sentèntzia. S’at a presentare apellu pro defensare s’apaltu dadu a sa Sada Itinera Onlus o s’apaltu at a colare a Sa Bèrtula, istransende su perìgulu de un’àteru pretu pro dannos emergentes eventuales?
Pro Ruju peruna duda. “S’afidamentu de su servìtziu depet passare, comente narat sa sentèntzia, a s’assòtziu Bertula Antiga, pro non incùrrere in àteros ricursos a dannu de s’amministratzione comunale”.
Leave a comment