Immàgine leada dae su situ ufitziale de sa NRL
Sa National Rugby League, su campionadu de rugby a 13 australianu, cumpostu dae 16 iscuadras australianas e una neozelandesa, at propostu, sàbadu 15 de freàrgiu, s’anteprima de s’istasione agonìstica cun s’All Stars match, oramai apuntamentu istitutzionale.
Finas dae sa prima editzione, in su 2010, a èssere protagonista est sa seletzione de sos mègius giogadores indìgenos, est a nàrrere aborigenos prus sos abitantes de sas ìsulas de s’Istrintu de Torres, su tretu de mare chi partzit s’Austràlia dae Papua Nova Guinea.
Si in sos primos annos giogaiant contra a una seletzione de sos mègius giogadores de su campionadu, sena diferèntzias de ratza, dae su 2019 s’iscuadra contrària est sa seletzione de sos mègius giogadores maoris.
Mancari s’ispòrt in Nova Zelanda non siat populare che a su rugby, est praticadu meda pròpiu intre sa populatzione indìgena de s’artzipèlagu.
Nàschidu a sa fine de su deghennoe sèculos dae su rugby, su rugby a 13, connotu in su mundu anglosàssone comente rugby league, pro ddu diferentziare dae su rugby union, giogadu cun 15 giogadores, est populare massimamente in su nord de s’Inghilterra e in Austràlia.
Sa NRL at semper valorizadu sa presèntzia de sas diferentes etnia otzeànicas e s’All Star Game est duncas, in antis de totu, un’omenàgiu a sos primos abitantes de Austràlia e de Nova Zelanda puru.
A pustis de sas dantzas de gherra rituales sas duas iscuadras, Indìgenos de Austràlia in màllia biaita e Maoris in màllia birde e bianca, ant cumintzadu una partida ecuilibrada chi su primu tempus est finidu sena de puntos.
Passados in bantàgiu cun una marcadura de sa prima lìnia Mitchell, chi at illonghiadu su bratzu ponende sa botza in meta, sos Indìgenos australianos ant a coa sufertu su parègiu de s’ala manca Arthars, chi deghe minutos a pustis at favoridu, cun unu passàgiu in bolu, sa meta de su cumpàngiu Laban.
A s’ùrtimu minutu Gagai, co-capitanu maori paris cun Fisher-Harris, cun unu placàgiu in extremis at iscansadu una meta, chi pariat giai fata, de su medianu Puru.
Resurtadu finale Maoris 10 Indìgenos de Austràlia 6 cun Arthars premiadu comente mègius giogadore in campu.
(gianni muroni)
Leave a comment