L’ant batijadu AVrecon, est un’aplicativu malèsigu e punnat a infetare sos router pro ambientes SOHO (small office – home office). S’iscoberta l’at fata Black Lotus Labs, grupu de chirca ispetzializadu in minetzas informàticas e parte de s’azienda Lumen Tecnologies.
Su malware in chistione at assachiadu 20 paisos cun prus de 70.000 dispositivos violados (a minudu router domèsticos o de ufìtzios minores), resessende a otènnere su controllu in modalidade de dura in belle 40.000 màchinas. Unu nùmeru mannu.
«Sa minetza – narat Michelle Lee, diretora de Black Lotus Labs – est abarrada cuada pro duos annos, creschende e pighende sas trassas de una botnet».
Ma it’est una botnet? Su tèrmine lu faghent sas paràulas robot e network, inditende una rete de dispositivos infetados (chi, in su casu nostru, sunt sos router SOHO) connòschidos finamentas comente bot o zombie: un’esèrtzitu de màchinas cumpromissas ghiadas dae su botmaster, est a nàrrere su padronu chi cumandat dae remotu pro fàghere atividades malèsigas.
E pro ite sos router SOHO sunt un’arriscu mannu pro su chi pertocat sa seguresa informàtica?
Sa risposta l’agatamus in sos agiornamentos: tropu pagos e a bellu a bellu. De prus, sa farta de costàntzia in su monitoràgiu aberit s’àidu a sos malintragnados.
Semper e cando est possìbile a pigare precautziones pro chi su perìgulu de devènnere dispositivos zombie mènguet. Pro nàrrere: dare particulare atentzione pro chi sos aplicativos siant semper agiornados; impreare firewall, antivirus e adotare istrategias de seguresa pro monitorare tentativos suspetos de atzessu; megiorare sa protetzione de sa rete wifi.
Finamentas s’alfabetizatzione informàtica de sos impiegados chi traballant in ufìtzios minores o in smart working est de importu mannu: sa seguresa cumintzat dae sa cussèntzia.
Gianfranca Orunesu
(Immàgine Wallpaperflare)
Leave a comment