Sa dibata de sa limba est torrada a s’allùghere: pro su chi pertocat una norma iscrita istandard in sa retza s’agatat cummentos e propostas de cada genia e calidade, in ue b’at gente chi nde bogat a campu referendum, àteros chi faeddant de sòtziu-linguìstica, àteros de sos sentidos, àteros de traditziones literàrias, àteros chi narant chi sa limba naschet dae bassu e chie de deretos a sa limba mama, in su sensu pròpiu de su faeddu chi teniat sa mama!
Ma de seguru sa proposta prus originale est sa de Pàulu Zedda, cussigeri de Sìnnai de sos “Rossomori”: “Seu a favori de una sperimantatzioni scolastica aundi si imperant liberamenti LSC, campidanesu standard e logudoresu standard. E aundi a pustis de unus cantu annus si medint is efetus e si scioberat sa chi funtzionat mellus.”. Partimus dae “si imperant liberamenti LSC, campidanesu standard e logudoresu standard”: in sas iscolas chie diat detzìdere cale de sas tres “normas” (?) si depet impreare? B’at una regulamentatzione o unu s’ischidat su mangianu e detzidet de impreare su “logudoresu istandard”?
Àtera pregonta: si Zedda faeddat de istandard chie at istandardizadu su campidanesu standard? E su logudoresu istandard? E a custu puntu pro ite sos nugoresos, sos baroniesos, sos ogiastrinos e sos de su Sulcis, si diant intèndere rapresentados dae “campidanesu standard e logudoresu standard”?
In sas biddas de custas regiones istòricas o de mesania si diat fàghere unu referendum pro cada bidda?
Si sa LSC est impònnida, non diant èssere impònnidos a sas àteras regione istòricas fintzas su “campidanesu standard e logudoresu standard”?
In sa parte restante de s’interventu Zedda faeddat de sa LSC comente de una limba, ischende bene chi est una grafia, una manera de iscrìere: ismèntigu o mala fide?
Totu custu arrèsonu serbit a cròmpere a carchi àtera pregonta: ma su diretivu de sos “Rossomori” ite idea nd’at de sa chistione? In su situ ufitziale issoro bi sunt duas setziones dedicadas a sa limba: una est bòida (Limba) e in s’àtera (Limba e Limbas) b’at petzi meledos personales de membros iscritos a su partidu. Ma su segretàriu Melis e su presidente Muledda ite idea nd’ant? Sunt pro una norma, sunt pro duas normas o pro una dialetitzazione de su sardu? E de sas positziones de Zedda ite nde pensant? No est chi pro non brigare cun carchi esponente o non dare dispraghere a un’àteru est mègius a non nàrrere nudda?