Giòbia 24 de làmpadas a sas sete de sero, in s’anfiteatru de s’iscola superiore Devilla de bia Monte Grappa in Tàtari, est prevista sa prima initziativa de Sassari Estate 2021. Est in programma difatis sa presentatzione de Rosa Zicchina e i suoi colera, romanzu de Cosimo Filigheddu.
Sa protagonista est una fèmina tataresa e su libru contat sos fatos capitados dae su colera chi sa tzitade turritana at connotu in su 1855 pro arribare a sa segunda epidemia, sa de su 1884. In mesu, s’unificatzione de s’Itàlia.
S’autore, cun unu limbàgiu prenu de tintas arcàicas, at chertu replicare sas atmosferas de su feuilleton de su de deghennoe sèculos.
In ocasione de sa presentatzione de su libru s’editore Alberto Pinna, titulare de sa Edes, at a omagiare su pùblicu presente cun una sèrie de figuras de Francesca Cavazzuti, ambientadas in su tempus de su romanzu.
Sas illustratziones sunt acumpangiadas dae didascalias cun testos leados dae s’òpera. Cavazzuti at a partetzipare a s’initziativa, paris cun Marisa Porcu Gaias, istòrica, chi at iscritu sa prefatzione de su libru.
In prus Alessandra Spiga e Teresa Soro, de sa Compagnia Teatro Sassari, ant a ammustrare unos cantos cuadros teatrales fatos pro s’ocasione e chi ammentant carchi passàgiu de su romanzu. De sa cumpangia teatrale at a èssere presente finas su presidente e diretore artìsticu Mario Lubino.
Cosimo Filigheddu est nàschidu in Tàtari in su 1951 e est giornalista dae su 1973, in antis in s’Unione e a coa in sa Nuova Sardegna. Est apassionadu de istòria locale, tantu de àere iscritu cun Sandro Roggio Buttate giù quella chiesa, dedicadu a sa fine de sa crèsia de Santa Caderina, e est autore de òperas teatrales in italianu e in tataresu, postas in iscena pro su prus dae sa Compagnia Teatro Sassari. Custu est su primu romanzu suo.
Rosa Zicchina e i suoi colera est essidu su 18 de maju. Sa presentatzione s’at a fàghere in collaboratzione sun sa libreria Koinè de Tàtari.
(gianni muroni)
Leave a comment