Sa Romania est bivende una crisi polìtica chi tenet finas efetos internatzionales. Su 24 de santandria coladu, in su primu turnu de sas eletziones presidentziales, est abarradu foras, a sorpresa, su partidu sotzialdemocràticu. Semper a sorpresa su prus votadu est resurtadu su candidadu indipendente Calin Georgescu (in sa foto).
In su segundu turnu de s’8 de nadale aiat dèpidu afrontare sa candidada de s’Unione Sarvade sa Romania Elena Lasconi.
Sas consultatziones eletorales però sunt istadas annullada dae sa Corte Costitutzionale ca Georgescu est istadu acusadu de finantziamentos pagu craros e de tènnere una positzione filorussa.
Est abarradu duncas in càrriga su presidente in essida Iohannis, chi però in ghennàrgiu s’est dimìtidu.
Eris 26 de freàrgiu Georgescu est istadu firmadu dae sa politzia pròpiu mentras fiant andende a formalizare sa candidadura pro sas eletziones noas, chi su primu turnu est fissadu su 5 de maju, e postu suta controllu giuditziàriu pro 60 dies; dd’ant proibidu puru de impreare mèdios de comunicatzione, internet incruidu.
Sas acusas sunt de chèrrere formare unu partidu fascista e antisemita e andare contra a s’òrdine costitutzionale.
In domo de una guàrdia sua personale ant atzapadu 10 milliones de dòllaros e billetes de aparèchiu pro Mosca.
S’interventu de sa magistradura rumena però paret coordinadu cun s’Unione Europea e duncas si presentat comente un’atzione prus polìtica chi non giuditziària, pro atacare positziones no alliniadas. A pustis de su provedimentu contra a Georgescu su parlamentare europeu austrìacu Helmut Brandstätter, de su partidu liberale NEOS, at decraradu: «At a tocare a àteros Paisos puru. Tenimus una cummissione in su Parlamentu Europeu pro un’Iscudu Democràticu e dda leamus a sa sèria».
Giai Thierry Breton, esponente frantzesu de sa destra europeista e ex cummissàriu europeu, su mese coladu aiat decraradu: «Depimus prevènnere interferèntzias e fàghere aplicare sas leges nostras. Dd’amus fatu in Romania e est craru chi dd’amus a dèpere fàghere in Germània, si ddo’at bisòngiu» cun riferimentu a sas ùrtimas eletziones tedescas.
Sa democratzia duncas non paret chi interesset meda, in sa gherra geopolìtica chi s’est iscadenada in custos ùrtimos meses e chi bidet a unu chirru s’amministratzione Trump e sa Rùssia e a s’àteru s’UE e su guvernu britànnicu.
(gianni muroni)
Leave a comment