Foto leada dae su situ ufitzale de s’AUR
S’ùndighi de martzu sa Corte Costitutzionale rumena at respintu su ricursu de su candidadu a sas presidentziales Georgescu contra a s’esclusione sua dae sa curta eletorale, detzìdida su 9 dae sa cummissione apòsita.
In parte de Georgescu, chi fiat partetzipende comente indipendente, si càndidat George Simion (in sa fotografia, paris cun Georgescu), de su partidu AUR, Alleàntzia pro s’Unione de sos Rumenos.
AUR est unu partidu de destra, chi s’obietivu printzipale est s’unificatzione de Romania e Moldàvia. Faghet parte de s’ECR, European Conservatives and Reformists party, su grupu de su parlamentu europeu de sos partidos de destra natzionalista.
De s’ECR, chi Simion nd’est su vitzepresidente, faghent finas parte, intre sos àteros, su PIS (Prawo i Sprawiedliwość, est a nàrrere Deretu e Giustìtzia) polacu, sos Democràticos Isvedesos e Fratelli d’Italia.
A custu puntu, in casu de vitòria de Simion su 4 de maju, est finas possìbile chi Georgescu siat nominadu primu ministru. Giai in su 2022 Simion aiat pensadu a Georgescu comente presidente onoràriu de su partidu suo, bidos sos assimìgios ideològicos.
In ogna modu sa cumpetitzione eletorale in Romania est oramai polarizada. Sa destra natzionalista tenet una positzione crara contra a s’Unione Europea, acusada de àere ordinadu pròpiu s’eliminatzione polìtica de Georgescu.
Unu travasu de votos dae s’ala de Georgescu a su partidu de Simion diat rapresentare unu càmbiu craru in sa polìtica de su paisu siat a ovest cun s’Unione Europea siat a est cun sa Moldàvia, zona sensìbile, ca est a làcana cun s’Ucràina, como in gherra cun sa Rùssia, e massimamente a làcana cun sa Transnìstria, chi Mosca cunsìderat oramai territòriu suo.
In sas ùrtimas dècadas difatis ddo’at àpidu unu càmbiu de populatzione dae un’ala a s’àtera de su frùmene Dnistro chi at fatu in modu chi una parte de sos moldavos ètnicos si siat trasferida a Moldàvia e sos russos siant como majoria relativa in sa repùblica autoproclamada indipendente.
Su 4 de maju s’at a ischire cale diretzione cherent leare sos rumenos.
(gianni muroni)
Leave a comment