S’iscuadra de istudiosos de Perseverance at iscobertu in Marte una roca curiosa a beru, ca est formada dae chentinas de botzigheddas. Custas isferas minores podent èssere unu mèdiu profetosu a beru pro cumprèndere mègius su tempus coladu de su pianeta e s’evolutzione geològica sua.
Sos istudiosos sunt traballende meda pro cumprèndere mègius dae ue benint custas isferigheddas chi tenent una mannària de pagos millìmetros. Sa cosa su rover Perseverance l’at imbènnida in unu giassu chi si narat Broom Point. S’agatat in sa parte de giosso de sos pendentiles de Witch Hazel Hill, in s’oru de su cratere Jezero, sa zona chi est istudiende dae cando est aterradu in Marte. Dae s’ òrbita in custu logu si podiat bìdere una sèrie de bandas craras e iscuras. Como, custas bandas s’ant a pòdere istudiare prus in particulare.
Totu est acuntèssidu cando Perseverance est resessidu a collire campiones de una de sas bandas craras. Faghende custu traballu Perseverance at osservadu una roca curiosa, cun una cunsistèntzia a beru particulare. A sa roca l’ant postu su nùmene de St. Pauls Bay. Est formada dae chentinas de isferas cun una tonalidade murra iscura, de pagos millìmetros de mannària. Calicuna est prus illonghiada, o ellìtica, cando chi àteras tenent òros angulares.
A bias sas isferas tenent finas istampigheddos. Tando sa pregunta de sos istudiosos est sa matessi chi de seguru nos immaginamus: cale est s’orìgine de custa formas curiosas?
No est sa prima borta chi s’osservant isferigheddas in Marte. In su 2004 su rover Opportunity aiat imbènnidu carchi cosa chi s’assimìgiat. Si tratat de su chi li narant «murtitzu martzianu», in su giassu de Meridiani Planum. Curiosity aiat finas imbènnidu isferigheddas in sas rocas de una zona chi si narat Yellowknife Bay, a probe de su cratere Gale.
