Su fatu de giustìtzia ue est ruta Roberta Bruzzone, una de sas criminòlogas prus nòdidas de su panorama televisivu italianu, paret chi siat arribadu a una furriada de importu. In s’ùrtima puntada de Quarto Grado, chi est essida in Rete 4 chenàbura su 27 de martzu, sa professionista at dadu a ischire chi sa Procura de Roma at giai formalizadu sa dimanda de archiviatzione pro sas acusas chi aiat retzidu.
Su casu fiat iscopiadu a pustis de una denùntzia presentada dae sa pedagogista Elisabetta Sionis. Segundu s’ipòtesi de incomintzu, formulada dae sos magistrados sardos, sa Bruzzone, paris cun àteras tres persones, diat àere fatu atividade de stalking. Sas cuntestatziones chistionaiant de “post” in sos “social network”, messàgios in chat, allusiones sessuales e fotomontàgios cunsiderados ofesivos.
Cun totu custu, a pustis de su trasferimentu de su fascìculu dae Casteddu a Roma pro cumpetèntzia territoriale, su magistradu incuirente nou at valutadu sos atos passados dae sos cullegas sardos, arribende a una conclusione diferente: non bi sunt sos elementos pro sighire a in antis. “Mèrcuris, s’avocadu meu at retzidu sa nova formale chi su magistradu at giai firmadu sa dimanda de archiviatzione”, at naradu sa Bruzzone in antis a sas telecàmeras de Gianluigi Nuzzi.
Mancari sa positzione protzessuale si siat acrarada in presse, su dannu de immàgine lastimadu dae sa criminòloga est mannu. Bruzzone at impreadu paràulas tostas pro descrìere su corfu retzidu dae sa nova in sos mèdia de comunicatzione e in sos “social”: “Apo sufridu una chida de iscarmentu, unu ludu mediàticu postu in pees dae acusas pagu sìncheras. Custu at iscadenadu contra a mie un’unda de òdiu, cun minetas de morte chi sunt giai istadas trasmissas a sa Procura”. Sa criminòloga at ispetzificadu su paradossu de èssere istada corfida dae s’opinione pùblica pròpiu mentras sa magistratura fiat giai a su puntu de decrarare chi sas acusas non teniant fundamentu perunu.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment