Su nùmene de Roberta Bruzzone, pessone famada de sa criminologia televisiva italiana, nch’est rutu in una traschia giuditziària grae coordinada dae sa Procura de Casteddu. S’avisu de indàgines acabbadas, firmadu dae su pùblicu ministeru Gilberto Ganassi, narat chi sa Bruzzone podet àere àpidu una fache de importu in un’azione de “stalking” a fiotu” contra a sa cullega casteddaja Elisabetta Sionis, psicòloga forense e giùighe de su Tribunale pro sos minores, e contra a sa fìgia minorenne sua.
S’inchiesta sarda trassat un cuadru chi faghet ispantu e ponet timòria: una “màchina de su ludu” chi pro tres annos diat àere bersagliadu a sa Sionis. Sigundu a sos incuirentes de Casteddu, Roberta Bruzzone non diat àere fatu totu a su solu, ma assistida dae unu fiotu de fidados (intre a custos Monica Demma e Giovanni Langella). Su coro de s’acusa est su coordinamentu de atacos in sos “social”, ammaniados peri “chat” privadas cun nùmenes de gherra che a “L’armata delle tenebre” o “Fbi”.
Dae sos pabilos de sa Procura nd’essit a pìgiu un’avisu de su cabudanni de su 2022 chi sos magistrados cunsìderant una proa segura: un’esortatzione essida dae sa Bruzzone pro “la atacare”, riferende·si a sa Sionis, cun su fine de l’infamare in pùblicu e de li pònnere su marcu de “farsa” a cara de sa comunidade de su web dedicada a su crime. Sa rivalidade, sigundu a sa recostrutzione de sa Procura de Casteddu, tenet raighinas in unu fatu giuditziàriu famadu: su protzessu pro s’iscontzu de Manuel Piredda (casu Pitzalis) de su 2017. Dae cussu momentu, s’iscòntriu professionale tra sas duas criminòlogas diat èssere peoradu in unu turmentu personale fatu de inzunzos, mentovos sessuales e finas disìgios de maladias, totu documentadu in sas trascritziones de sas chat chi como faghent parte de sos atos.
In su mentres chi sos documentos sunt istados imbiados a Roma, s’impiantu fraigadu dae s’acusa abbarrat tostu in Casteddu. Mancari s’archiviatzione de una denùntzia presentada de reghente pròpiu dae sa Bruzzone contra a sa Sionis, sa positzione de sa criminòloga liguresa si fàghet difìtzile: sos incuirentes sardos sunt seguros chi in palas a sos vìdeos de YouTube, de sas diretas Twitch e de sos post infamantes, b’esseret istada s’idea pretzisa de fagher dannu sa cullega sarda in s’àminu in dignidade professionale.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment