Sighit pro totu su mese de nadale, in Otieri, s’espositzione de sos ritratos foto-poèticos tirados dae Salvatore Ligios. Sa mustra sua, “Sogni meridiani – Viaggio nella poesia contemporanea della Sardegna”, pertocat difatis sas caras e sas carenas de sessanta poetas de custa terra cun improvisadores, iscritores de versos meledados, performer de poetry slam.
Sa faina, ideada e patrotzinada de s’assòtziu Premio Ozieri Aps (in sinergia cun s’amministratzione comunale) l’aiant inaugurada su 25 de santugaine comente eventu culturale a costàgiu de sa de 65 editziones de su cuncursu literàriu nòdidu. Como sa detzisione, gràtzias a sa collaboratzione de s’Istituzione San Michele, de lassare finas a s’ùrtimu die de s’annu sa possibilidade de ammirare sas fotografias in su Museu tzìvicu archeològicu “Alle Clarisse” in pratza de Baden Powell.
Su de Ligios, comente isse etotu narat, «est unu caminu longu e intrigadore dae su càntaru de su mistèriu chi alimentat una pràtica prus chi no antiga e chi galu oe nùdrigat sa fantasia e s’immaginatzione de s’òmine cuntemporàneu». S’autore at impreadu sa pellìcula in biancu e nieddu chi isvilupat pro contu suo in sa càmera oscura. Sas imprentas mannas pro s’espositzione las ant fatas in su laboratòriu GreatPrint de Giorgio Pisu.
Custos sos oràrios pro las pòdere ammirare: dae su martis a sa domìniga dae sas 9 a sa una e dae sa tres a sas sete de merie; lunis est serradu.
Salvatore Ligios est nàschidu in Biddanoa Monteleone, in ue istat, su 1949. Dae su 2000 a su 2008 at dirìgidu su museu Su Palatu, tzentru espositivu ispetzializadu in fotografia e, in sos annos, at espostu sos traballos suos in Sardigna, Itàlia e Europa. Dotzente de fotografia dae su 2008 a su 2015 in s’Acadèmia de Tàtari, at publicadu unos cantos libros; s’ùrtimu su 2024, “Conversazioni II. Incisioni e fotografie”, chistionende cun s’artista Gabriella Locci.
Gianfranca Orunesu
Leave a comment