Eris sero su Parlamentu at aprovadu una risolutzione a subra de sa gherra in Iran. Su documentu no est unu presòrgiu pro sos sèberos benidores de su guvernu, ma est un’inditu pro espressare s’àndala chi a sas duas cameras legislativas agradat de prus.
Sa dibata est istada alluta meda, cun sos duos ministros de sa Defensa, Crosetto, e de sos Èsteros, Tajani, in pelea cun sas opositziones e chi ant naradu, forsis, prus de cantu cheriant. Sa Presidente de su Cussìgiu a s’imbesse, no est andada a chistionare, ma at lassadu una decraru in ràdiu in ue at naradu: «Non semus in gherra e non bi cherimus intrare».
Crosetto in sa dibata at dèpidu amìttere chi sa gherra incumintzada dae sos USA e dae Israele l’at ispantadu, ca no est istada ammanigiada cun alleadu perunu, e tando nemmancu cun s’Itàlia, chi non nde ischiat nudda. Àtera cosa ammìtida est chi est un’atacu a fora de cale si siat deretu internatzionale e chi no at cobertura dae s’ONU. Tajani dae s’ala sua, cun sa sòlita manera sua pagu abbista, at naradu chi est tzertu chi s’Iran fiant lompende a sa bomba, ma de seguru non s’ischit, e chi forsis s’at a iscobèrrere a gherra agabbada. Paràulas làdinas, chi però non s’agatant in su testu coladu.
Sa risolutzione, difatis, non mentovat una borta nen sos USA nen Israele. No espressat manc’una cundenna. Pedit petzi bator cosas: un’impinnu prus mannu pro amparare a sos sordados e a sos interessos italianos in sa regione; un’agiudu a sos Istados alleados de su Gulfu Pèrsicusu; unu sustegnu a sos Paisos europeos chi diant pòdere sufrire un’atacu a sas bases issoro e sas fortzas chi sunt compidende sas làcanas de s’Unione; su rispetu de sos acordos pro sas bases Usa in Itàlia, chi si podent impitare pro suportu tècnicu e logìsticu, ma non pro fàghere tzucare aèreos prontos pro sa gherra.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment