Su 12 de maju sos Istados Unidos de Amèrica ant retzidu unu primu grupu de rifugiados de su Sudàfrica. Sunt afrikaner, sos biancos de ratza olandesa, ma finas frantzesa e tedesca, e de limba afrikaans, chi ant detzìdidu de lassare sa terra issoro denuntziende discriminatzione ratziale e persecutziones dae parte de su guvernu de Pretoria.
Su Dipartimentu de Istadu americanu ddos cunsìderat vìtimas de ratzismu dae parte de sa majoria niedda. Su guvernu sudafricanu negat sas acusas e s’esistèntzia de unu genotzìdiu in atu.
Sos afrikaner sunt partidos dae s’aeroportu internatzionale de Johannesburg e sunt lòmpidos a Washington, isbarchende in s’iscalu Dulles. Depiant èssere 49 ma su grupu fiat aizu prus mannu, cun 59 persones. Sunt pro su prus famìllias, cun fìgios piticos.
Su guvernu istadunidesu ddos at a distribuire in sos diferentes istados de s’Unione.
Custu primu isbarcu, giai chi nd’ant a arribare àteros, non benit a sorpresa. Difatis su 7 de freàrgiu su presidente Trump at firmadu un’òrdine esecutivu chi suspendet sos agiudos econòmicos a su Sudàfrica intre sas àteras cosas finas pro su tratamentu riservadu a sos biancos.
A su matessi tempus s’amministratzione at cumintzadu unu programma pro atzetare rifugiados afrikaner.
In una decraratzione pùblica a sos giornalistas Trump at naradu ca ddos sunt retzende ca «ddos sunt ochiende». In prus at agiuntu: «Est unu genotzìdiu chi est capitende e boisàteros – riferidu a sos giornalistas – no iscriides de custu».
In prus at criticadu su cumportamentu de su mundu de s’informatzione narende: «A sos massajos biancos ddos ochient e sas terras issoro sunt cunfiscadas in Sudàfrica. Si fiat capitadu a s’imbesse fiat istada s’unica cosa chi nd’aiant faeddadu».
A sos akrikaner acollidos ddis ant a dare sa tzitadinàntzia americana.
Sas tensiones ratziales in Sudàfrica non sunt finidas cun sa fine de s’apertheid. Dae issara sa situatzione est a s’imbesse, cun sos biancos suta pressione e vìtimas de atacos, massimamente a sas fatorias issoro. A fine de maju est in programma un’atopu istitutzionale intre Donald Trump e su presidente sudafricanu Cyril Ramaphosa. Temas: sos raportos cummertziales e sa chistione de sos afrikaner.
(gianni muroni)
Leave a comment