At bidu sa lughe sa versione 5.0 de Lakka, distributzione Linux nàschida pro mudare su computadore in una console de retrogaming. Una nova chi agradat meda a chie punnat a sos giogos de sos tempos colados. Nàschida comente modìfica de su kit de distributzione LibreELEC, movet dae s’emuladore de giogu RetroArch e podet emulare unu muntone de sistemas; tenet finamentas funtziones utiles comente su reconnoschimentu automàticu de su joypad e sa riprodutzione in rete.
«Semus cuntentos de annuntziare – custas sas paràulas de sos isvilupadores de su progetu – una versione noa e agiornada de Lakka. Mudamentos dae sa versione 4.3 movende dae su sistema de build LibreELEC 11.0; RetroArch agiornadu a 1.17.0; cores agiornados a sas versiones prus reghentes e unos cantos noos agiùnghidos comente dirksimple – Dragon’s Lair player, DOSBox, ep128emu, geolith, jaxe, numero, thepowdertoy – The Powder Toy, vice_xpet – Commodore PET, vircon32 – console de giogu virtuale ispiradu a 16/sistemas a 32 bit, vitaquake2 – Quake II; agiornadu a su 24.0.4; kernel Linux agiornadu a sa lìnia printzipale 6.1.77, amlogic 6.1.38 agiùnghidas immàgines pro Raspberry Pi 5, Raspberry Pi Zero 2 in Retroflag GPI Case 2W, Raspberry Pi Compute Module 4 in Retroflag GPI Case 2, computadore genèricu – suportu pro GPU NVIDIA (impreande driver NVIDIA proprietàrios, immàgine separada), OrangePi Zero2, OrangePi 3 LTS; BananaPi CM4, BananaPi M2 Pro, BananaPi M25, BananaPi M5, Radxa Zero, Radxa Zero2, WeTek Core, WeTekHub».
Unu detàlliu interessante a beru est sa possibilidade de impreare Lakka in paritzas prataformas hardware. Una borta chi sa distributzione l’installamus in su dispositivu portàtile (pro nàrrere, una crae USB), bisòngiat petzi a copiare sas ROM, atzèndere sa prataforma e collegare su joypad.
In GitHub agatamus informatziones in contu de fartas de funtzionamentu, problemas vàrios e solutziones. S’ùrtima versione de Lakka si podet iscarrigare dae custu ligàmene. Sas istrutziones sunt craras meda e s’utente benit acumpangiadu in sos vàrios passos de acumprire pro agatare sa versione adata a su dispositivu suo.
Gianfranca Orunesu
Leave a comment