Oe 7 de austu sa Corte Suprema de su Regnu Unidu de Gran Bretagna e Irlanda de su Nord at istabilidu chi Shamina Begum no at a pòdere fàghere ricursu contra a sa revoca de sa tzitadinàntzia britànnica. Begum, nàschida in Londra in su 1999, fiat andada, a s’edade de bìndighi annos, a Sìria pro gherrare cun s’Isis, s’organizatzione terrorìstica islàmica, contra a su guvernu sirianu legìtimu.
In su 2019 su guvernu britànnicu dd’at leadu sa tzitadinàntzia. Dae issara Begum at chircadu, de badas, de s’opònnere a sa detzisione. Difatis sos ricursos de sos legales suos non sunt istados atzetados.
Begum, una borta lòmpida a Sìria, si fiat cojuada cun unu militante de s’Isis e aiat tentu tres fìgios cun issu, totu mortos a pipios. Como s’agatat in unu campu de detentzione in su nordest de s’Istadu mediorentale, in ie sunt inserrados mìgias de ex cumponentes de s’organizatzione terrorìstica.
Begum est de ratza bengalesa ma finas su guvernu de su Bengala Otzidentale dd’at negadu sa tzitadinàntzia.
Sa detzisione de sa Corte Suprema britànnica lompet in unu momentu delicadu pro s’istadu. Su 29 de trìulas coladu unu pitzocu de deghessete annos, fìgiu de immigrados ruandesos, Axel Rudakubana, at mortu a istocadas tres pipias.
Bebe King, de ses annos, Elsie Dot Sancombe, de sete e Alicia Dasilva Aguiar, de noe, fiant in’un’iscola de dantza de Southport cando sunt istadas atacadas a morte dae Rudakubana.
Su fatu at iscadenadu una reatzione violenta de parte de sa populatzione britànnica, cun una sèrie de manifestatziones, massimamente in Londra, Manchester e Liverpool, contra a s’immigratzione.
Su tema est partzende su mundu polìticu britànnicu, cun acusas a su guvernu e a sa politzia de adotare medidas prus pagu fortes contra a su populatzione immigrada discriminende in custu modu sa populatzione autòctona.
(gianni muroni)
Leave a comment