de Giuseppe Pepe Coròngiu
Sunt prontos sos emendamentos a sa lege de bilantzu 2015 pro pònnere dinare a limba e Die. Los ant fatos unu su Partito dei Sardi, s’àteru sos de Rossomori. Dughentas mìgia èuros pro una chistione e belle unu milione de mesu pro s’àtera. Non sunt tzifras mannas, ma nessi sunt calicuna cosa. Sos datos s’agatant in sos giassos de custas formatziones.
Como però est a bìdere si s’àula at a aprovare custos càmbios de su documentu contàbile prus importante de sa Regione chi, dae sa Giunta, l’aiant propostu sena mancu unu sisinu pro sas chistiones natzionales e identitàrias. Sos sinnales parent positivos ca sos cussigeris regionales Zedda e Sale, in un’assemblea polìtica soberanista fata in Tàtari chida colada (in ue at partetzipadu finas calicunu ativista e àteros de sos ufìtzios linguìsticos) ant pigadu publicamente s’impitzu. In prus, s’assessore a su bilantzu Paci, respondende eris a una pregonta in su tg de Sardegna Uno, at naradu chi in Cussìgiu b’at àere “maggiore attenzione” pro sa limba sarda.
Duncas, sa festa natzionale de sos sardos de su 28 de abrile, paris cun sa polìtica linguìstica, sunt apicadas a sa fortza chi podent àere in sa cuntratatzione consiliare unos cantos cussigeris soberanistas. No est una cosa achistiada, sende chi si podiat dare a custos duos elementos una prioridade giai in sa proposta de sa Giunta. Intamen est essidu su documentu de proposta in ue si sunt ismentigados de pònnere su dinare a Die e Limba. Sigomente s’apentu polìticu si mesurat finas dae cussu, si diat dèpere congruire chi su Guvernu Acadèmicu de Sardigna non ponet in contu perunu custas chistiones. E posca pro ite est de òbligu a lòmpere in Cussìgiu pro agatare unu mèdiu?
Paret un’acontzu pejus de su dannu. Ca si est s’assemblea chi depet currègere su guvernu no est una grandu cosa. Su messàgiu chi lompet a sa comunidade sarda est pagu craru e, comente si narat a s’italiana, est ‘opaco’. Cosa chi non depet èssere nen pro s’una chistione nen pro s’àtera. Ca su giudu, su prestìgiu est fundamentale siat pro sa limba chi pro sa càusa natzionalista de sa Die de sa Sardigna.
Sa cosa posca ponet un’àtera duda: podent divènnere custas batallas sienda de unu ischieramentu ebbia finas si cullegadu comente cussu soberanista? Ca posca b’est su perìgulu chi sos àteros partidos las botzent petzi pro cussu…pro un’interessu de fatzione. Amus a bìdere.
In s’intervista de su diretore de Sardegna Uno Mario Tasca a Raffaele Paci si sunt nòmenados sos comitados chi ant gherradu pro sa limba in custos ùrtimos meses. In prima filera b’est istadu su Coordinamentu pro su Sardu Ufitziale chi bene at fatu a urtimera a non si fidare de sas promissas e a sighire a cuntierrare pro una càusa bona.
Posca s’at bìdere cantu investit in dinare pro sa limba sarda custa majoria e su Guvernu Acadèmicu in proportzione pertzentuale cun totu sas resursas de su bilàntziu.
Leave a comment