Sa presèntzia de paba Beneitu XVI in sa Crèsia pariat, a sa majoria de sa gente, pagu de importu. Unu betzu chi faeddaiat pagu e chi si faghiat bìdere puru de mancu, ma in realidade su rolu suo est istadu de fundamentu in custos annos pro mantènnere sa paghe. Ratzinger, difatis, fiat su riferimentu e su chi faghiat chietare sos pìscamos prus cunservadores, mescamente sos istadunidensos. Como chi est mortu, b’at gente chi faeddat de un’arriscu de partziduras, brigas o peus de iscisma.
No est unu mistèriu chi paba Frantziscu no agradat a sos cunservadores, ma su dispraghere suprit a s’òdiu in carchi pìscamu. Pro esempru Càralu Maria Viganò at naradu, in su 2018, chi Frantziscu est ammanigende s’istrada pro s’Anticristu e chi est unu ligadu a s’òrdine mundiale nou. In sos USA s’ala prus a dereta de sa Crèsia est andende contra a Frantziscu in una manera prus o mancu forte, a sa muda o in sèberos ufitziales, ma a sighidura dae annos. Positziones chi fiant però arressadas dae Beneitu XVI, chi renessiat a istudare sas framas prus caentes, cun decraradas e literas. Como chi non b’est prus su paba emeritu, unu cantu de cardinales est ordingende carchi infadu pro Frantziscu.
Paba chi dae s’àtera ala depet atuare fintzas a sa Germània e a s’Europa, chi a s’imbesse cherent abèrrere de prus. Preìderos fèminas, prus aficu a sos raportos cun sos omosessuales e preìderos cojuados, sunt sas chistiones prus arresonadas e chi pesant cuntierras.
Sos annos imbenientes ant a èssere de importu mannu pro un’istitutzione chi est partzida intre ortodossia e annoamentu e chi dae ocannu inghitzat su sìnodu in ue s’at a acrarare su caminu benidore.
(redatzione)
Leave a comment