Su 24 de maju sa Dirigente Iscolàstica de Pasada Antonella Piredda at abertu unu protzedimentu disciplinare contra a sas maistras Gonaria Carroni e Maria Andreana Deledda ca no ant chèrfidu fàghere fàghere a sos dischentes sos nòdidos “TEST INVALSI”.
Ma ite sunt custos test? Est una prova iscrita chi at sa punna de valutare su livellu de aprendimentu de sos dischentes de sa de tres classes de s’iscola secundària de primu gradu (sa chi naramus galu “tertza mèdia”), ma chi dae ocannu si faghet fintzas a sas àteras classes. Antzis a nàrrere mègius sa cosa, dae ocannu, dae su 8 de martzu, cun su guvernu Monti, custu provedimentu at sa punna de:
1) fàghere autovalutare s’iscola matessi pro mèdiu de paràmetros dados dae su MIUR. Custos datos sunt a pustis valutados dae espertos chi aprontant unu pianu pro pòdere megiorare;
2) donare una “cura” a sas iscolas chi ant problemas: a sas iscolas isseberadas lis ant a mandare sos nùcleos de valutatzione esternos, chi depent istèrrere su pianu de megioru;
3) agiuare s’iscola pro mèdiu de s’impreu de sas tecnologias noas, de cursos de formatzione de sos dotzentes, de su personale ATA e de sos prèsides. Custa parte pertocat a s’INDIRE, unu grupu de espertos, chi podent èssere fintzas esternos;
4) valutare sos dirigentes.
S’idea est duncas de adotare sas tècnicas de valutatzione de su traballu de sas aziendas americanas: pro mèdiu de test!
In Pasada totu sas maistras de sas elementares ant refudadu de fàghere custos test e su 7 de maju ant iscioperadu. Su 10 de maju sa dirigente at chèrfidu chi sas maistras l’aerent fatu fàghere a sos pitzinnos de segunda e de cuinta elementare. Ma su 10, ca sas maistras non podiant torrare a iscioperare, b’at capitadu chi sunt istados sos babbos e sas mamas a non mandarent sos fìgios a iscola: totu contra a sos test.
A iscola sa die b’at intradu tres pitzinnos ebbia, ma sos mazores issoro aiant firmadu una decrarazione narende chi non cheriant chi sos fìgios aerent fatu su test, ma chi cheriant chi aerent fatu s’atividade didàtica fitiana.
Sas duas maistras pro respetu de su traballu issoro e de sa voluntade de sos babos e de sas mamas de sos tres pitzinnos ant sighidu cun s’idea issoro sena pònnere mente a s’òrdine de servìtziu de sa Dirigente. Como depent gherrare contra a unu provedimentu disciplinare pro “atziones chi non sunt cunformes a sa responsabilidade, a sos doveres e a sa funtzione de un’educatore e de unu dotzente”. Garantire a sos pitzinnos sa voluntade de su babbu e de sa mama est un’atzione de iscussentziados pro su male chèrrere a sos pitzinnos?
Custu assempru sighit a mustrare comente sas diretivas ministeriales sunt larganas dae sas realidades locales, comente siet ora chi sa Regione si pighet s’autonomia chi li tocat fintzas in àmbitu iscolàsticu e comente s’iscola sarda apat bisòngiu de megioros chi no ant a bènnere de seguru dae test fatos “a s’americana”.