The Voice Generations, su talent show ghiadu dae Antonella Clèrici in Rai Uno, su 13 de martzu at bidu pigare a su palcu sa giòvana sarda de bintisete annos Làura Pirrigheddu, originària de Tèmpiu, chi at ischidu ammesturare su talentu de sa boghe cun s’identidade culturale sua. E mègius de gasi no aiat pòtidu fàghere. Acumpangiada dae Kate Marie Gimondi, Làura s’est presentada a sas Blind Auditions cun una versione bella meda de “All about that bass” de Meghan Trainor. Sa fortza de ambas duas at corfidu deretu sos coach: Loredana Bertè est istada sa prima a carcare su pulsante, sighida dae sa galavera de Clementino, chi s’est postu a ballare in su mentres de s’esibitzione.
Su momentu prus artu est arribadu cando sa curiosidade de sos giùdiches at atopadu sas raighinas sardas de Laura. Sa giòvana at istregadu s’istùdiu cantende in gadduresu unos cantos de sos sutzessos istòricos de sos coach. At comintzadu cun Nek, cantende una variante mai intesa a primu de “Laura non c’è”. No est istadu de mancu Rocco Hunt chi, postu in curiosidade dae s’armonia de sa limba, at preguntadu un’omàgiu pro sa Bertè: est nàschida gasi una reinterpretatzione de “Mare d’inverno” chi at lassadu sos coach sena paràulas.
Làura Pirrigheddu no at coladu su turnu ebbia; at mustradu chi sa mùsica podet èssere unu ponte in mesu a generatziones e territòrios. Sa presèntzia sua est una resone de bantu pro sa Gaddura e pro sa Sardigna intrea, ca at leadu sa limba sua in prima serada cun alligria e azigu de atrivimentu creativu chi at conchistadu su pùblicu e sos sòtzials. Gràtzias sa cantada de Làura, in totu Italia est istadu ladinu chi in Gadduresu si podent iscrìere e cantare, sena pèrdere perunu incantu, sos clàssicos mannos de su pop italianu, furriende.los in carchi cosa chi, belle che antiga, podet pàrrere prus moderna de s’italianu.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment