Su de Majorana 1 est s’annùntziu mundiale chi rapresentat una furriada epocale in contu de carculadores cuantìsticos. S’innovatzione, dedicada a su fìsicu Ettore Majorana, est targada Microsoft. S’azienda de Redmond at bogadu a campu custu protzessore. E l’at fatu isvilupende e impreende una casta de supercondutores topològicos elaborados a livellu atòmicu pro mèdiu de sa fusione de s’arseniuru de ìndiu cun s’allumìniu.
Materiales chi nche sunt addae de sos istados sòlidu, lìcuidu o gassosu. S’architetura de Majorana 1 est un’òpera maistra de innovatzione cun una capatzidade de acasagiare finas a unu millione de qubit in unu chip ebbia chi non nche bàrigat sa mannària de unu parmu. In su nùcleu topològicu de su chip b’at 8 qubit, topològicos fintzas issos e prus minudos, prus lestros e prus istàbiles de sos traditzionales.
Custu cheret nàrrere chi sos càrculos sunt prus afidàbiles e b’ant a èssere aplicatziones pràticas noas in setores comente sa chìmica, s’iscièntzia de sos materiales e s’agricultura. Esèmpios de solutziones innovativas podent èssere sos chi pertocant sos materiales chi s’acontzant de se, sos catalizadores pro sa torrada a nudda de sas microplàsticas, s’otimizatzione de sos enzimas pro sa fertilidade de sos terrinos.
Sa tecnologia chi est a palas de su protzessore Majorana 1 at otènnidu validatziones mannas, reconnoschimentos iscientìficos e un’artìculu peer-reviewed publicadu in sa rivista Nature. De prus: sa Darpa, est a nàrrere s’agentzia guvernativa de su Dipartimentu de sa difesa de sos Istados unidos de Amèrica – incarrigada pro s’isvilupu de tecnologias noas pro s’impreu militare – at seletzionadu a Microsoft pro s’ aprontu de su primu computer cuantìsticu tollerante a sos errores in iscala industriale. At a serbire a potentziare sa chirca e s’innovatzione in sos campos de su progressu umanu?
Gianfranca Orunesu
Leave a comment