Martis 10 de nadale in Il Vecchio Mulino de Tàtari, s’Istitutu Bellieni at presentadu s’anteprima de unu progetu editoriale in collaboratzione cun sa fundatzione Coppieters, tzentru de istùdios polìticos cun sede in Brussellas.
Antonello Nasone, Immacolata Salis e Daniela Masia ant ofertu unu cuadru generale de su tema a livellu europeu e a coa ant dadu carchi detàlliu subra calicunu de sos personàgios ogetu de s’istùdiu.
Nasone, chi faghet parte siat de su Bellieni siat de sa Coppieters, at sutaliniadu chi s’idea federalista est fundada subra sas diferentes identidades linguìsticas de Europa. Intre sos chi prus ant cumprèndidu custu problema ddoe fiant Antoni Simon Mossa in Sardigna e Edmond Simeoni in Còrsica, ambos duos pistighingiados, giai in sos annos ‘60 e ‘70, pro su benidore de sos pòpulos issoro chi bidiant in perìgulu de si nch’ispèrdere de su totu, neghe de sas polìticas coloniales de Itàlia e de Frantza.
Immacolata Salis at presentadu sas figuras de Alfonso Castelao e de Marianna Bussalai. Su primu, galitzianu, teorizaiat s’esistèntzia de una natzione galitziana, chi teniat prus cosas a cumone cun su Portogallu chi non cun s’Ispagna. Sa segunda, oranesa, fiat bènnida a èssere unu puntu de riferimentu pro su Partidu Sardu in sa Sardigna tzentrale.
Masia at imbetzes faeddadu de Rougemont, pensadore isvìtzeru, chi coniugaiat federalismu e ecologismu, e de Maurits Coppieters, fiammingu, chi ligaiat s’autodeterminatzione polìtica a sa chistione linguìstica.
Sa publicatzione chi regollet custos ritratos, chi at a essire ocannu chi benit, oferit una mirada subra su mundu de su federalismu europeu a traessu de unos cantos protagonistas suos. At a èssere in tres limbas: inglesu, italianu e sardu.
Sas figuras esaminadas sunt sas de Camillo Bellieni e Antoni Simon Mossa, de s’isvìtzeru Denis de Rougemont e de su valdostanu Émile Chanoux, de su galitzianu Alfonso Daniel Rodríguez Castelao, de su corsicanu Edmond Simeoni, de Marianna Bussalai e de Maurits Coppieters.
(gianni muroni)
Leave a comment