Sa cummissione incarrigada dae sa Regione de istandardizare sa limba turritana at presentadu su traballu suo in Tàtari. Est istada s’ùrtima tapa de unu caminu cumintzadu un’annu a como e chi giai sos meses colados aiat bidu una prima essida pùblica de su progetu semper in sa tzitade tataresa.
De sa cummissione faghent parte Mario Marras, giai professore de latinu e poeta e tradutore in tataresu, Maurizio Virdis, catedràticu de s’Universidade de Casteddu, e su fonòlogo Riccardo Mura.
Sos tres ant elaboradu sa proposta de istandard cun sa supervisione de s’Istitutu Camillo Bellieni de Tàtari.
In sos locales comunales de Largo Infermeria San Pietro, a sa presèntzia de s’assessore de sa Cultura Laura Useri, de su dirigente de su setore Cultura Alberto Mura e cun s’introdutzione de sa presidente de s’Istitutu Bellieni Doloretta Lai sos espertos ant fatu a connòschere su resurtadu de su traballu issoro.
Giai in antis aiant fatu a cumprèndere ca non b’at nudda de rivolutzionàriu, ma chi ant chertu rapresentare in s’iscritura sèberos giai presentes in sa traditzione literària de s’idioma turritanu.
S’istandard ortogràficu si presentat comente un’aina de traballu pro sos chi cherent iscrìere o chi traballant cun su tataresu. Custa proposta est indiritzada massimamente a sas comunas de Tàtari, Sosso, Istentinas e Portu Turres.
Custu progetu rapresentat s’atuatzione de sa lege regionale 22 de su 2018 chi proponet de dotare de un’ortografia ufitziale sas limbas de sas comunidades alloglotas de Sardigna. A prus de sa limba turritana sunt interessados su gadduresu e su tabarchinu, chi est previstu chi ant a tènnere issos puru una grafia normativizada. Su sardu tenet giai dae annos s’istandard ortogràficu suo.
Sa presentatzione at bidu sa partetzipatzione de unu pùblicu de apassionados de tataresu e de chistiones linguìsticas.
(luca foddai)
Leave a comment