-de Giuseppe Pepe Coròngiu-
No est una “mesa” polìtica traditzionale e ne mancu una alleàntzia eletorale. L’ant definida una “cunferèntzia aberta” in ue chie bolet traballare pro un’alternativa natzionale chi guvernet sa Sardigna lu podet fàghere.
Est su messàgiu fundamentale de s’addòbiu, dedicadu a primìtzios pro s’imprenta ma chi posca s’est mudadu agiumai in dibàtitu, cunvocadu eris mangianu in su Thotel de Casteddu, dae unas cantas formatziones de s’àrea indipendentista e tzìvica. “Medas, sàbios, inparis”, su tìtulu chi cheret bortulare ditzos malos e istereòtipos chi blocant sas mentes galu in antis de sos protzessos.
Novidades medas. No est unu puntu de arribu custu ischieramentu, antzis sas ghennas sunt abertas pro totus. Finas pro cussos chi finas a como ant naradu chi nono. In sala peruna tensione o arrennegu, no in tames sa presèntzia, a su matessi tempus, de ex innimigos chi, pro calicuna iscuta, ant detzisu de torrare a pònnere in bèrtula sas lepas. Ambiente positivu, tando, e pàsidu a su puntu chi b’at àpidu finas propostas e interventos interessantes.
Sa chistione de s’ufitzialidade de sa limba sarda paret in fines chi apat agatadu su logu suo in custu mundu indipendentista chi, pro annos e annos, pariat chi s’esseret ismentigadu de cantu est de importu custu sèberu pro una rivolutzione culturale in sa sotziedade. Unos cantos arresonos fiant in sardu puru e in sardu (belle a norma) fiant finas sas diapositivas chi ant proietadu in s’interi de su cunvegnu. No est mancada calicuna ruta de istile,ma si podet megiorare.
In sa limba natzionale at comintzadu a arresonare Bustianu Cumpostu de sa Sardigna Natzione chi at naradu chi est istadu “unu sentidu de responsabilidade natzionale a nos giughere a inoghe, pustis annos e annos de cuntierra e brigas. Como semus in custa die paris: non semus totus uguales, b’at diferèntzia, ma faghimus parte de un’ùnica natzione e custu non lu depimus ismentigare”.
Est de su mese de santandria 2015 chi si traballat pro custu progetu. In mesu finas peleas non resessidas, comente sas eletziones de Casteddu. Ma a bisu de Claudia Zuncheddu (Sardigna Lìbera) non tocat a tènnere pregiudìtzios e est pretzisu a andare a in antis totu cantos. “Custa giunta regionale – at naradu Zuncheddu- at fatu una reforma sanitària chi est peus de una gherra e sa gente non s’at a pòdere curare. Bolimus abarrare frimmos sena fàghere nudda?”.
Su sentidu, in custu mundu natzionalitàriu, est de si leare sa Sardigna pro la guvernare ca como s’est tocadu su puntu prus bassu. Gianfranco Sollai, de Gentes, una de sas pagas siglas chi est abarrada dae Sardegna Possibile, at faeddadu de tzerachias e de iscraos faghende un’analizu fungudu e apassionadu in contu de sa situatzione econòmica de sa Sardigna chi nde depet essire dae un’istadu feu.
<So fieru de èssere inoghe -at naradu Cristiano Sabino, de su Fronte Indipendentista Unidu- ca nois semus naschidos mescamente pro fàghere custu traballu. Custu no est unu logu serradu, nen un’acordu eletorale. Sa Sardigna, e sa polìtica sua, tenet bisòngiu de una rivolutzione copernicana”.
Su presu est istadu mannu finas dae banda de Gianluca Collu de Progetu Repùblica de Sardigna chi at mentovadu unu biàgiu longu longu pro lòmpere a custu arribu. “S’ispàtziu chi amus creadu no est su nostru – at declaradu – est de totus e pro totus. Unu de sos obietivos nostros prus mannos est su reconnoschimentu de sa natzione sarda”.
In sala atentu meda dae banda de sos giornalistas, ma finas de su pùblicu chi non fiat fatu petzi de ativistas, ma finas de lìberos tzitadinos, intelletuales “de area” o finas curiosidadosos de s’eventu. Presente finas Anthony Muroni, giai diretore de L’Unione Sarda chi est ammaniende un’eventu a sorpresa, galu misteriosu, pro sàbadu chi benit.
De importu sos pensamentos de Frantziscu Casula, chi at ammentadu s’importu de sa chistione de sa limba, e de Giovanna Casagrande, chi at regordadu imbetzes su mètodu de Sardegna Possìbile.
Unu messàgiu sulenu de collaboratzione e agiudu duncas, ma cun chistiones galu abertas chi nemos at tocadu. Su referendum costitutzionale, pro nàrrere, chi perunu at mentovadu. Comente at naradu calicunu de sos ascurtadores su linguàgiu est galu meda fatu de islogan, sena programmas cuncretos pro su “oe” si non s’aguantu a su poderiu e s’atragàgiu a sos soberanistas, sos indipendentistas chi traballant cun Pigliaru chi sunt bersàlliu de crìticas (ma non prus de su tantu).
Si faeddat meda de diàlogu e de tempus benidore e pagu de su presente, ma sas pregontas mannas abarrant abertas. B’at un’ischieramentu locale sardu (finas cun s’agiudu de listas tzìvicas non indipendentistas) chi podet èssere a tretu de si leare sa Sardigna e de la guvernare? B’at unu leader capatzu de interpretare su protzessu cun un’iscuadra democràtica chi lu sustèngiat? B’at unu programma cuncretu, realìsticu de guvernu sotziale e econòmicu fora dae sos islogans? Ite si faghet cun Partito dei Sardi, Rossomori, La Base e Psd’az? E sos grillinos? E si sas leges eletorales abarrant blindadas sas alleàntzias tècnicas sunt amitìdidas o nono? O si sighit a abarrare fora dae sas istitutziones a fàghere testimonia ideològica? Ite s’at a fàghere pro fraigare un’alternativa natzionale dae oe in antis? Bonu traballu a sos sàbios.