Sa colònia penale de Mamone (in provìntzia de Nùgoro) est protagonista de una novidade in contu de tecnologia e sanidade. Dae su 21 de maju, a sos detenudos los ant a pòdere bisitare dae remotu pro mèdiu de su Metaversu.
Duos sos àmbitos in via isperimentale chi faghent parte de su “Progetto Metaverso ASL Nuoro”, cun s’obietivu de «megiorare s’efitzèntzia de s’assistèntzia sanitària in sos istitutos curretivos, boghe·nde·nche sas barrieras chi bortas medas lassant sos detenudos isolados e afidados a issos matessi».
S’initziativa est su resurtadu de una collaboratzione intre sa Asl de Nùgoro, sa domo de reclusione de Mamone, su spin-off acadèmicu Chain Factory de s’Universidade de Casteddu, Dipartimentu de Iscièntzias Econòmicas e Aziendales e State1, sotziedade operativa in su setore de su Metaversu chi, in sos ùrtimos meses, at isvilupadu un’ambiente virtualizadu in ue sos detenudos podent addobiare sos dotores in un’ispàtziu immersivu. Pro mèdiu de s’impreu de visores particulares (otzales chi permitint de si mòvere intro de unu ispàtziu simuladu), mèigos, patzientes e personale infermierìsticu ant a pòdere interagire comente chi siant presentes in su matessi logu. Sas distàntzias, duncas, sunt iscantzelladas.
S’obietivu printzipale de custu progetu est «megiorare s’atzessibilidade a sas curas sanitàrias pro sos detenudos, barighende·nche sas barrieras collegadas a s’isulamentu e sas dificultades logìsticas».
«S’atzessu a sas curas sanitàrias pro sos detenudos est unu tema semper prus chistionadu in Itàlia, in ue istruturas prus chi non prenas e mèngua de fundos influint in manera negativa in sa cuotidianidade de chie iscontat sa pena» narat Alessandro Spano, dotzente de su dipartimentu de Iscièntzias econòmicas e aziendales de s’Universidade de Casteddu. «Creimus chi custu progetu pilota potzat rapresentare un’initziativa de vàllia pro megiorare sas cunditziones detentivas de sos incartzerados, e fintzas unu modellu de propònnere àteras bortas pro nche giùghere a su pianu virtuale prestatziones mèigas de urgèntzia minore liberende resursas pro totu sas prestatziones sanitàrias indiferìbiles».
«Comente diretzione istratègica aziendale – custas sas paràulas de Paolo Cannas, diretore generale de s’Asl 3 de Nùgoro – amus investidu, fintzas dae su cumintzu, in sa meighina de prossimidade, isfrutende sos istrumentos innovativos (Metaversu, telemeighina etc) cun sa finalidade de megiorare sa calidade de sas curas in su territòriu e, in unu casu ispetzìficu, permìtere de garantire s’assistèntzia sanitària in una realidade in ue s’ispostamentu est problemàticu. Pro fortuna – concruit Cannas – in sa realizatzione de su progetu Mevaversu amus agatadu un’interlocutore sensìbile comente Vincenzo Lamonaca, diretore de sa Domo de reclusione de Mamone, chi li torramus gràtzias pro sa pretziosa collaboratzione».
Gianfranca Orunesu
(Fonte immàgine: asl3nuoro.it)
Leave a comment