Fintzas si semus in un’època chi non tenet rispetu meda pro sas istitutziones, mannas o minores, e chi non resesset a leare a sa sèria nemmancu sas tragèdias de su mundu, paret chi sa majoria de sas persones in sas retzas sotziales siant pranghende a sa reina Elisabeta.
Sa chistione est chi pro una sotziedade de s’ispetàculu, comente cussa in ue semus, eris est morta una protagonista de unu muntone de film, de immàgines, memes e brullas. Sa gente la connoschiat comente una presèntzia belle fitiana e in su pensu de persones medas fiat una personàgia galana e geniosa: una giaja chi riiat semper e chi si bestiat cun colores dìligos. B’at calicunu fintzas chi paret iscobèrrere chi si podet mòrrere gràtzias a sa morte de sa reina, chi nemos fuet da sa sennora niedda, nemmancu isse etotu.
Chie, a s’imbesse, est unu pagu prus sapidu, si serat chi custa acontèssida cheret nàrrere s’iscumparta de unu cantu de importu de s’istòria de su Noighentos. Una testimòngia de sos cambiamentos mannos de su sèculu coladu e de custu chi est andende a dae in antis: est istada una persone chi at bìvidu dae sa sigunda gherra mundiale fintzas a sa nàschida de internet, at connòschidu belle totu sos chi como agatamus in sos libros de Istòria, artistas e isportivos de primore e at influentzadu sos seberos de unu Paisu de importu, comente su Rennu Aunidu, chi in su mundu tenet unu poderiu mannu.
Chistiones culturales e sotziales, ma non polìticas. Pro fortuna non est torrende sa monarchia in Europa e fintzas in Inghilterra est oramai prus unu sinnu folclòricu, ùtile pro sos turistas, chi no un’istitutzione cun sa capatzidade de mudare de a beru su surcu ischertadu dae àteros.
(redatzione)
Leave a comment