Pro ite semus superstitziosos

A su chi narant, s’atora ispagnola  Elsa Pataky teniat mìgias de colore diferente in una de sas primas auditziones chi at fatu in  Hollywood. Pro sa presse, s’aiat postu sas primas chi aiat agatadu. S’auditzione est andada bene meda. In su  “casting” chi at fatu a pustis issa s’at postu sas mìgias giustas, e sa proa est andada male Dae tando Elsa Pataky ponet semper mìgias de colore diferente in sas auditziones chi faghet. Nat chi li dant sa bonaura.

No ischimus si custu contu si l’ant imbentadu, però dat s’idea  de comente  naschet e s’afortit  una superstitzione  in sa mente nostra. Isperemus chi Elsa Pataky non si infadet ca l’amus leada pro esempru. Tocamus ferru.

CHIRCHENDE SU LIGÀMENE PÈRDIDU

Una de sas motivatziones prus de importu de sa mente umana est sa netzessidade de agatare ligàmenes intre eventos distintos chi li permitant de antetzipare sa realidade. Sa seletzione  naturale at agiuadu sa chirca de relatziones càusa-efetu pro iscobèrrere sas règulas de su mundu e promòvere, in custa manera, sa supravivèntzia e sa reprodutzione.

Semus chircadores cumpulsivos de conessiones, archeòlogos de sa regularidade, futuròlogos intuitivos. Su sistema cognitivu nostru est allèrgicu a s’ambiguidade e a su de no ischire ite podet acuntèssere. S’ assotziatzione de eventos est s’antìdotu a custa “reatzione allèrgica mentale”.

Sas superstitziones sunt sa parte iscurigada de custa tendèntzia preditiva gasi profetosa pro sa supravivèntzua: ponent in pare acuntèssidas chi, a nàrrere su beru, non sunt ligadas  de peruna manera. Ite b’intrat su colore de sas mìgias cun sas calidades artìsticas de Elsa Pataky? Sa punna umana a intzertare su venidore faghet essire a campu custas connessiones. In fines, s’imparòngiu de assotziatziones est su puntu de mesu de s’acuisitzione nostras de cumportamentos.

(sa redatzione)

Leave a comment