Immàgine leada dae @Rahbarenghelab
Sa Ghia Suprema noa de sa Repùblica Islàmica de s’Iran, Mojtaba Hoseini Khamenei nominadu su 9 de martzu a pustis de sa morte a suta de sas bombas israeloamericanas de su predetzessore, su babbu Alì, at publicadu sa prima allega pùblica.
Dae s’account X, Khamenei junior at laudadu s’inteligèntzia e sa fortza de su pòpulu iranianu e at naradu ca sa volontade est sa de sighire a gherrare e a si difèndere.
In prus at agiuntu ca su blocu de s’Istrintu de Hormuz, chi est a puntu de iscadenare una crisi petrolìfera, at a sighire.
Khamenei at finas torradu gràtzias a sos paisos de su chi at mutidu su Fronte de sas Resistèntzia.
At ammentadu su crìmine de su bombardamentu a s’iscola elementare Shajareh Tayyebeh de Minab in ue sunt mortas prus de 160 istudiantes, a prus de sos maistros issoro e de carchi mama.
S’ayatollah at fatu riferimentu a sas bases americanas in sos paisos àrabos dae in ue sunt partidos sos atacos sutaliniende ca sa controfensiva iraniana est contra a sas bases ebbia e no a cuddos paisos bighinos. A custu propòsitu at finas agiuntu ca custos istados depent àere cumprèndidu ca sa difesa chi ddis garantiant sos americanos fiat fàula e duncas ddos cussìgiat a ddas serrare.
S’Iran, dae parte sua, cheret petzi tènnere relatziones de amighèntzia cun sos bighinos suos sena de impònnere unu raportu coloniale.
In fines at invitadu sos musulmanos a partetzipare a sa die de Quds, istituida pròpiu dae s’Iran in su 1979 e tzelebrada s’ùrtima chenàbura de su ramadan, dedicada a su pòpulu palestinesu. Quds est su nùmene àrabu de Gerusalemme.
Pro como Mojtaba Khamenei, 57 annos, veteranu de sa gherra contra a s’Iraq in ue at gherradu cun sos pasdaran, non s’est bidu in pùblicu, non s’ischit si pro motivos de seguresa o si, comente afirmant a s’ala de sos otzidentales, ca est in s’ispidale, fertu issu puru in sos bombardamentos.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment