A pustis de duos meses dae su corfu de Istadu firmadu a mesu caminu Evgenij Prigožin, sa ghia de su grupu Wagner, est mortu in un’intzidente aèreu, o nessi gasi narant sas autoridades russas. Cun isse totu su cumandu de sa brigata. Sas dudas però sunt maicantas.
S’Ipòtesi de un’intzidente cumbinchet paga gente. Putin cheriat una vindita e dae cussu 24 de làmpadas l’aiat minetzada. Sa paghe intre sos duos òmines de poderiu pariat istrana e su presidente russu fiat dae chidas ponende manu a s’ammanìgiu de una versione noa de sa brigata de mertzenàrios, pro isboidare su grupu Wagner de sordados e influèntzia. Fintzas sas condolèntzias chi Putin a decraradu in sas televisiones sunt pàrfidas a duas caras: reconnotu su gabbale de su mortu, at però naradu fràsias chi podent pàrrere una genia de “su chi fiat chirchende, l’at agatadu”.
Sa manera de sa ruta de s’aèreu no est crara. Dae sas immàgines paret chi s’aparèchiu fiat prenu de istampos. Chi at isparadu? Si sos corfos sunt tzucados dae intro b’at duas possibilidades: o calicunu at isparadu (chie a chie?), o s’aèreu fiat prenu de munitziones chi sunt tzocadas cun su calore de su fogu. Su problema est chi paret chi sos istampos sunt fintzas in sas alas. Tando podet èssere chi ant proadu a lu faghet rùere cun sa contraèrea, ma semus faeddende de unu tretu de Rùssia intre Mosca e San Pedruburgu, sos ucrainos sunt a tesu. Sos americanos a s’imbesse narant chi s’esplosione, pro cantu ant cumpresu e bidu cun sos satèlites, est nàschida dae una bomba chi fiat cuada a intro. Proas non nd’ant a essire nen como nen pro tempus meda.
Sa duda si Prigožin e sos àteros generales esserent pròpiu in cussu aèreu est iscumparta petzi custu mangianu, ma non dae sas persones serentes, ma posca su reconnoschimentu de sos corpos, fatu dae unu sordadu: carasos chi ant leadu corfos fortes e chi fiant in mesu a sas framas. Chistione agabbada tando, ma non de su totu. Ca Prigožin at fatu de su mùrigu de sas informatziones, de s’ammisturu de faulas e realidade un’ispetzializade sua, pro fàghere bi balangiare isse e Putin. Paret complotismu, ma fintzas sos òrganos de seguresa internatzionales sunt galu dudosos. Ma ite càmbiat si l’ant mortu, o si est biu e cuadu? Prigožin aiat documentos maicantos a subra de sos crìmines de Putin e de àteras persones de poderiu in Rùssia, informatziones chi podent fàghere male e criare problemas. Si l’ant mortu custas armas podent essire a campu, si est biu, cuadu dae sas istitutziones russas, nono e Putin at pòdidu ammustrare sa fortza sua cun àsiu.
Ma àteros mistèrios abarrant abertos: comente mai su 24 de làmpadas Prigožin s’est firmadu? Ite l’at dadu Putin a cuncàmbiu? Est possìbile chi apat crètidu a sas garantzias de su presidente sena ammanigiare nudda? Pro ite su generale fiat in Rùssia a subra de un’aèreu, si non podiat nemmancu prus intrare in su Paisu?
Gabriele Tanda
Leave a comment