S’ex presidente sudcoreanu Yoon Suk Yeol, de su Partidu de su Podere Polulare (in sa foto in tribunale), est istadu cundennadu a s’ergàstolu, cun sentèntzia de giòbia 19 de freàrgiu, pro àere impostu sa lege martziale in su 2024 e imbiadu s’esèrtzitu a ocupare s’Assemblea Natzionale.
Cunforma a sa detzisione de sa Corte de su Distretu Tzentrale de Seul su polìticu at a dèpere iscontare sa pena in presone.
Segundu sa lege coreana Yoon, cun custas acusas, podiat finas èssere cundennadu a morte.
Su giùighe Ji Gwi Yeon at motivadu sa detzisione narende ca «sa decraratzione de sa lege martziale, s’annùntziu de sa proclamatzione sua, s’atu de blocare s’Assemblea Natzionale, s’organizatzione e s’operatzione pro arrestare esponentes de s’Assemblea Natzionale e àteros polìticos, s’ocupatzione de sa Cummissione Eletorale Natzionale, s’àere chircadu de nche leare server e arrestare sos impiegados, totu custu rapresentat un’atu de rebellia».
At agiuntu puru ca segundu issu «custos atos de rebellia fiant bastante fortes pro istorbare sa paghe in Corea de su Sud, in Seul e in s’àrea metropolitana in ue tenent sede s’Assemblea Natzionale e sa Cummissione Eletorale».
In ogna modu su cullègiu de difesa de s’ex presidente at annuntziadu ca at a presentare ricursu. Segundu sos avocados sa detzisione de impònnere sa lege martziale leada issara fiat legìtima, ca faghiat parte de sos poderes cuntzèdidos a su presidente e chi Yoon at aplicadu pro difèndere s’interessu de s’Istadu.
Paris cun Yoon ant cundennadu àteros protagonistas de sos fatos de su 2024. Sa prus cundenna mala dd’at leada s’ex ministru de sa difesa Kim Yong Hyun, chi dd’ant dadu 30 annos de galera.
Custa sentèntzia diat dèpere pònnere sa paràula fine a sa crisi polìticu-istitutzionale de su paisu asiàticu cumintzada su 3 de nadale de su 2024 e concruida cun sas eletziones de làmpadas de ocannu passadu.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment