António José Seguro bi l’at fata. S’esponente sotzialista at otènnidu sa vitòria in su ballotàgiu de s’8 de freàrgiu in sas presidentziales portughesas leende su 70% de sas preferèntzias. Una crèschida manna, si pensamus chi in su primu turnu de su 18 de ghennàrgiu aiat pigadu petzi su 31,11%. Custu de su segundu giru definitivu est unu resurtadu chi no li cunsignat petzi sas craes de su Palácio de Belém, ma chi dat fintzas una risposta a totu sos chi fiant preocupados pro sa crèschida de sa dereta radicale (chi si fiat firma a su 23% e chi como annanghet 7 puntos pertzentuales).
Seguro, ex leader de su Partidu sotzialista chi fiat abarradu in s’umbra a pustis de s’era de António Costa, est resèssidu in un’impresa chi gasi segura no lu fiat. Sa de pònnere paris un’eletoradu frammentadu, presentende·si comente su garante de s’istabilidade a pustis de su deghènniu de Marcelo Rebelo de Sousa. La vitòria imponente contra a André Ventura, chi s’est firmadu a su 30%, ammustrat chi, mancari sa crèschida in sos sondàgios e su pesu parlamentare de Chega, su paisu lusitanu no est galu prontu pro s’optzione sovranista.
De cada manera Ventura essit dae custu votu cun una base eletorale consolidada. Su 30% suo est unu sinnale chi s’arrennegu sotziale, alimentadu dae sa crisi abitativa e dae s’inflatzione, tenet raighinas fundudas. E chi a custu arrennegu non b’at rispostas de manca (Seguro est unu moderadu).
Curiosidade: custas fiant eletziones particulares pro more de una variàbile climàtica: sa tempesta Lenardu chi, cun sas abbas fortes suas e sos impèigos logìsticos, at custrintu a 36mìgia eletores de 68 comunes su rinviu de su votu a su 15 de freàrgiu. Unu detàlliu, custu, chi però non mudat su resurtadu eletorale.
Pro Seguro su disafiu comintzat dae como in susu. At a dèvere gestire una cunvivèntzia difìtzile cun su guvernu e giogare su ruolu de s’àrbitru in intro de unu sistema polìticu semper prus polarizadu.
mauro piredda
immàgine seguropresidente.pt
Leave a comment