Sighint sas novas faeddende de intelligèntzia artifitziale e creschet sa cumpetitzione intre sas potèntzias. Est de eris s’annùntziu de un’agente nou gratùitu bogadu a campu dae sa startup tzinesa Zhipu AI. AutoGLM Rumination, custu su nùmene suo, narant chi est a tretu de esecutare chircas fungudas e acumprire a atividades prus complicadas comente sa pianificatzione de biàgios o s’istèrrida de raportos detalliados de chirca.
Pro satisfare sas rechestas de sos utentes cun lestresa e profetu, custu agente est alimentadu dae duos modellos de sa matessi dita: su GLM-Z1-Air in contu de arresonamentu (chi podet assegurare sas matessi prestatzione de su R1 de su cuncurrente DeepSeek mancari cun velotzidade oto bias prus manna e cun petzi una de trinta partes de sas resursas informàticas) e su GLM-4-Air-0414. Custu AutoGLM Rumination lompet duncas a su mercadu mustrende·si prus cumpetitivu non de su de DeepSeek ebbia, ma finamentas de Manus, cummertzializadu dae sa cumpangia omònima comente su primu agente de intelligèntzia artifitziale mundiale generale. Ma si bi cherent 199 dòllaros su mese pro s’impreu de s’agente Manus, s’amministradore delegadu de Zhipu AI, Zhang Peng, at garantidu in pùblicu chi s’agente issoro l’ant a frunire a s’indonu dae sos canales ufitziales de s’azienda (est a nàrrere dae su situ web ufitziale e pro mèdiu de s’aplicatzione pro sos dispositivos mòbiles).
Est una cuncurrèntzia, custa, chi cheret bida in intro de su modellu econòmicu tzinesu chi li narant sotzialismu de mercadu: Zhipu AI, dita chi naschet su 2019 comente ramu aziendale de unu laboratòriu de s’Universidade de Tsinghua, est benefitziària de finantziamentos guvernativos prus chi non mannos, cun Pechino chi l’at in pessu intregadu tres tziclos intreos e consecutivos in unu mese ebbia. S’investimentu prus reghente l’at otènnidu dae sa tzitade de Chengdu: 300 milliones de yuan (belle 40 milliones de èuros).
Gianfranca Orunesu
Leave a comment