de Angelo Canu 
S’ambìtzia de su prèmiu de Literadura “Casteddu de sa fae” est manna: donare unidade e isvilupu a sa limba e a sa literadura sarda. Est su chi ant decraradu Roberto Tola, sìndigu de Pasada e Diegu Corràine, presidente de sa Sotziedade culturale Casteddu de sa Fae in sa Domo de sas Damas de Pasada custu sero a sa presentada de su bandu. 
Pro sos chi cherent leare parte a su prèmiu mannu fiat s’isetu de connòschere su bandu nou ca in su comunicadu de imprenta fatu sas dies coladas b’aiat iscritu chi “sas novidades chi ant a èssere presentadas su 25 de cabudanni in s’editzione 2015, ant a èssere medas”. E medas sunt istadas a beru: una cumpositzione noa de sa giuria cun unu mìnimu de 15 giurados, unu gemellàgiu cun àteros prèmios literàrios in àteras limbas natzionales emergentes – ocannu si pensat a su prèmiu Ostana, iscrituras in limba materna -, una norma iscrita racumandada (sas normas de sa LSC) e unu cuntributu in dinare a editores chi ant a publicare s’òpera premiada in àteras limbas. 
Su prèmiu pro su binchidore at a èssere sa publicatzione de s’òpera e s’oportunidade de bortare s’òpera matessi in àteras limbas.
A su comintzu de s’addòbiu Roberto Tola at presentadu su progetu e su diretivu, ammentende a totus chi su Prèmiu at a èssere dedicadu annu cun annu a personàgios nòdidos de sa limba e de sa cultura sarda e chi ocannu est dedicadu a Zuanne Frantziscu Pintore, mortu duos annos a su 24 de cabudanni, binchidore de su prèmiu matessi in su 1988 cun “Su Zogu”. 
A s’agabbu b’at àpidu un’ammentu suo pro mèdiu de sas testimonias de sos amigos e de su fìgiu Carminu: “Oe esseret istadu cuntentu de s’àndala noa de su prèmiu: issu est istadu un’assempru mannu de unidade de su natzionalismu, de sa limba e de sa literadura sarda”. 
Est fintzas pro sighire su surcu chi issu at contribuidu a trassare chi su bandu est istadu disinnadu in custa manera, pro chi siat un’assempru mannu pro totus sos amantiosos de sa limba, ma fintzas pro totus sos chi si sunt acurtziende como a sa limba sarda. 
In frau de su seranu sunt istados ammentados sos binchidores de sas àteras editziones e intre custos ammentamus: Mialinu Pira, Benvenutu Lobina, Larentu Pusceddu, Giuseppe Tirotto, Palmiro de Giovanni, Giancarlo Tuscer e gai a sighire. 
Custu su bandu de s’editzione 2015:
BANDU DE CUNCURSU · EDITZIONE 2015
Sa SOTZIEDADE CULTURALE CASTEDDU DE SA FAE / SCCF cun su patronadu de sa COMUNA DE PASADA,
Bandit su Cuncursu “Prèmiu de Literadura Casteddu de sa Fae“
Fundadu dae Màuru Deledda Editzione 2015 dedicada a Giuanne Frantziscu Pintore
ROMANZU in Limba Sarda
Regulamentu
—Sas òperas, inèditas, in prosa, in forma de romanzu, devent èssere iscritas in limba sarda e non devent èssere istadas mai premiadas o sinnaladas in àteros cuncursos.
—At a èssere premiadu, cunforma a su pàrrere de sa giuria, su mègius romanzu.
—Su prèmiu pro s’autore de s’òpera chi binchet est:
- s’editzione de s’òpera premiada in unu libru publicadu a contu de sa SCCF, chi est titulare de sos deretos literàrios pro tres annos dae sa data de publicatzione;
- su diploma chi mustrat su Casteddu de sa Fae.
Pro cuncùrrere, s’òpera devet èssere iscrita cunforma a sas normas linguìsticas de referèntzia de sa RAS (Delìbera Giunta Regionale n. 16/14 de su 18-4-2006 “Limba Sarda Comuna”). Sa SCCF at a pòdere sistematizare, si bi nd’at bisòngiu e de acordu cun s’autore, su testu e sa grafia de s’òpera premiada cunforma a sas normas in pessu numenadas.
- S’òpera premiada at a èssere publicada petzi in limba sarda. In prus, sa SCCF at dare unu cuntributu de € 1.500 a cada editore chi pùblicat su libru in un’àtera limba. Sa SCCF est titulare de sos deretos de tradutzione pro tres annos dae sa data de publicatzione.
- S’òpera e su libru premiadu ant a èssere presentados in Pàsada e in sa bidda in ue istat s’autore.
- Sas òperas in cuncursu devent èssere a su mancu de 70 pàginas (de 60 caràteres x 30 rias cada una).
- Sas òperas devent èssere imbiadas, in 2 còpias imprentadas a:
Segreteria de su “Prèmiu de literadura Casteddu de sa Fae”, c/o Biblioteca, via Nazionale 1, 08020 PASADA, NU (tel. 0784-854494, oras 9-12) e devent arribbare intro de su 31 de martzu de su 2015. Intro de sa matessi data, devet arribbare una còpia in formadu WORD de s’òpera in cuncursu a: casteddudesafae@gmail.com —Sa GIURIA at a èssere formada a su nessi dae 15 professores de matèrias literàrias, de ruolu in sas iscolas superiores sardas. Sos giurados ant a espressare su giudìtziu issoro, dae 0 a 10, tenende in cunsideru calidade de su lèssicu, curretesa de sa norma de su sardu e originalidade de s’idea e de sa trama.
fotos de Angelo Canu
Leave a comment