Intro su 30 de cabudanni si podet firmare pro sa proposta de lege de initziativa populare mutida Pratobello 24, chi cheret pònnere unu frenu a s’ispeculatzione energètica in Sardigna.
Diant bastare 10 mìgia firmas ma s’obietivu est de lòmpere a 50 mìgia.
S’artìculu 3 de s’Istatutu Ispetziale de sa Regione Autònoma de Sardigna, in su puntu f, narat ca sa Sardigna tenet podestade legislativa pro edilìtzia e urbanìstica.
Sa proposta de lege populare, cunforma a custu puntu de sa carta istatutària, cheret firmare sos impiantos fotovoltàicos e eòlicos chi giai como, segundu unu decretu legislativu de su guvernu Draghi, sunt invadende su territòriu sardu.
Sos promotores ammentant ca sa sentèntzia de sa corte costitutzionale n.78 de su 2018 afirmat ca in sas funtziones urbanìsticas sunt incruidas finas sas chi pertocant sos benes culturales e ambientales.
Sa proposta de lege tenet 9 artìculos. Su primu ispricat cales sunt sos obietivos e finalidades. In primis sa pianificatzione e su guvernu de su territòriu pro amparare sos giassos de interessu naturalìsticu, archeològicu e comunitàriu, in secundis “sa disciplina urbanìstica de sos logos ogetu de programmas econòmicos, ambientales e istratègicos de natura comunitària, istatale e regionale”, in tertiis sa regulamentatzione de sos impiantos de energia rinnovàbiles, in giassos giai fraigados e de fraigare, petzi pro autoconsumu, in fines sa regulamentatzione de sos interventos in giassos pùblicos.
Su primu firmatàriu de sa proposta de lege, partida dae una bintina de primos tzitadinos e chi est tenende s’adesione de semper prus comunas e comitados, est su sìndigu de Orgòsolo Pascale Mereu. Pròpiu pro cussu s’initziativa est mutida Pratobello 24, in ammentu de sa mobilitatzione de sa bidda orgolesa, in su 1969, contra a unu polìgonu militare chi cheriant fraigare in Pratobello e chi, pro more de su nono de sa gente, no at mai bidu sa lughe.
Sos interessados a firmare podent pedire informatziones in sas comunas de residèntzia.
(gianni muroni)
Leave a comment