Povertade a su 10% e màndigu imboladu. Cale agenda?

A bos l’ammentades s’Agenda 2030 pro s’Isvilupu sustenìbile? Emmo, su programma de atzione sutascritu deghe annos a como dae sos guvernos de sos 193 Paisos membros de s’Onu cun 17 punnas e 169 traguardos.

Unu cheret ammentadu oe sende chi ruet sa die “natzionale” contra a s’isprecu alimentare. Ca su traguardu 12.3 narat chi «intro de su 2030» (duncas b’amus galu chimbe annos) tocat a l’«ismesare».

A l’ismesare a livellu globale pro càpite in sos puntos de bèndida, in sas domos, reduende sas pèrdidas in sas cadenas de produtzione, in sas forniduras. Custa est sa punna a minudu. Ma comente semus postos?

In Itàlia, datos 2024 de s’osservatòriu Waste Watcher, nch’imbolamus unos 500 grammos de màndigu a persone cada chida, belle 25 chilos in un’annu de frùtora, ortalìssia, late, gioddu, pane.

Carculende custu isprecu in dinare, petzi in sos botos de s’arga de sas domos nostras b’at unu dissipu de belle ses milliardos de èuros. Sos milliardos sunt noe in s’isprecu de sa filiera. In contu de Pil b’amus unu puntu chi pesat. E totu custu sena pigare in cunsideru sos gastos ecològicos.

Tzifras non cherent intesas: mescamente ca b’at unu nùmeru annu cun annu semper prus mannu de persones chi non resèssint a si nudrigare cun regularidade; mescamente si belle su 10% de sa populatzione est in cunditziones de povertade.

Est de importu duncas a sensibilizare, mancari su problema printzipale non siat in intro de sas domos ma, comente amus bidu, in sa produtzione e in sa distributzione.

Una produtzione e una distributzione chi su prus de sas bortas non sunt orientadas a sas netzessidades de sa populatzione ma a sos profitos de sos chi nde controllant su protzessu industriale: coltivatziones e allevamentos intensivos, tzentros cummertziales, fast food, parastàgios e magasinos prenos de màndigu chi non bendent e chi nch’imbolant una bia chi est guastu.

Forsis bi diat chèrrere un’àtera agenda cun àteras punnas.

mauro piredda