Pompeo Calvia si podet cunsiderare sena de duda su mègius poete in limba tataresa. De seguru est su prus connotu. Nàschidu in su 1857, aiat traballadu in s’archìviu comunale, chi a unu tzertu puntu Enrico Costa nde fiat istadu capu.
Calvia, pro more de su babbu, chi fiat de Mores, connoschiat su sardu puru e in sardu at iscritu poesias, che a Su duos de làmpadas, dedicada a Garibaldi, ma a li dare sa fama sunt istados sos cumponimentos in rima in tataresu. Sa regorta Sassari Mannu est de su 1912.
In ie rapresentat s’umanidade tzitadina de su tempus, intre sa fine de su de 18 sèculos e su cumintzu de su de 19. Est unu mundu de passàgiu chi est lassende a bellu a bellu sos ritmos de sa tziviltade agrìcula pro leare cuddos de sa vida urbana.
Ma s’autore s’est impignadu finas cun sa prosa. Ammentamus su romanzu istòricu Quiteria, essidu pro sa prima borta a puntadas in sa rivista La Sardegna letteraria.
Che a s’amigu e collega Costa, Calvia dat unu cuntributu pro chi non siat ismentigada sa càusa natzionale sarda. Quiteria difatis est ambientadu in su 1478, s’annu de sa derrota de Lenardu Alagòn e de sa fine de sos bisos de indipendèntzia de s’ìsula dae s’ocupatzione aragonesa.
In su romanzu puru s’autore nos ammustrat personàgios chi parent bogados dae su tempus suo chi non depiat èssere tantu diferente dae su de sa Sardigna de su 1500.
A prus de sa passione pro sa poesia e s’iscritura prus in generale, Calvia teniat cudda pro s’arte. L’aiat ereditada dae su babbu, chi aiat progetadu su campanile de sa crèsia de Santa Caderina de Mores, su prus artu de Sardigna.
Disegnu, chi fiat professore in su tempus chi li lassaiat s’atividade in s’archìviu, e mùsica faghiant parte de sa vida de ogna die de su poete. Sa mugere Cristina Manca fiat pianista e custu l’aiat permìtidu de s’abitare cun musicantes de professione chi lompiant a Tàtari pro cuntzertos e rapresentatziones de òperas lìricas.
(luca foddai)
Leave a comment