A calicunu diat bènnere gana de aboghinare: “Annuntio vobis gaudium magnum; habemus Sardum!”
In ue b’est su sardu? In s’agenda polìtica de sos partidos pro sas regionales de su 2014. Belle che totu sos partidos – francu sos Riformadores, chi ant naradu chi sunt in favore de su bilinguismu emmo, ma italianu-inglesu e su PDL chi sa limba sarda mancu l’at mentovada – ant postu o sunt ponende sa limba sarda e su bilinguismu in sas punnas de importu pro su programma eletorale.
S’ùrtimu est istadu Andria Mùrgia, de su PD (eja de su Partidu Democràticu Italianu!) chi at naradu chi at cumpresu s’importu de su sardu pro sos sardos: «In Bruxelles dognunu fueddada sa limba sua e deu appu cumenzau a fueddai in sardu. Fueddausu in limba po chistionai de is cosas importantis». S’idea sua est de propònnere a sos chi si sunt candidende a sas primàrias de su tzentru-manca de fàghere una dibata totu in limba sarda “po chistionai de is cosas importantis”, apuntu.
Si fintzas in su PD ant cumpresu s’importu de su sardu pro sa crèschida de sa Sardigna cheret nàrrere chi su bentu est nou de a beru: si gasi est chi tochent sas càmpanas a festa.