Cun su tempus de 9’55” Giuanne Pedru Fronteddu, giovaneddu orgolesu de 14 annos, est su campione italianu nou in sos 80 metros pranos.
Fronteddu, chi no aiat mai cùrridu in peruna dìsputa de atletica finas a unu mese a como cando l’at tesseradu sa Delogu de Nùgoro, in ue l’allenat Màssimu Marcias, at cùrridu in cara de su pluri campione mondiale de sos chentu e de sos dughentos metros Usain Bolt. Giuanne Pedru in antis at bìnchidu sa bateria sua, e a pustis finas in sa finale est arribadu in antis de sos àteros, mancari prus mannatzos e prus allenados.
Sa vitòria l’at dedicada a su tziu.
“Sa cursa fiat bella a beru” ant naradu su babu e sa mama de su pitzinnu chi sunt tzucados a Roma “est mòvidu bene, tando s’est abballassadu, ma comente fiant a cantu a arribare at àpidu unu bellu recuperu e at bìnchidu ”
Finas sos pitzinnos de Orgòsolo ant pòdidu bìdere sa cursa pro mèdiu de sa lavagna multimediale e fiant tifende a cantu podiant a su cumpàngiu issoro.
“Amus tifadu e a pustis festadu” at naradu sa professora de Educatzione fìsica Fele “apo bidu dae deretu chi Giuanne Pedru fiat unu curridore bonu, l’allenaia in unu camineddu acanta de sa palestra”.
Cuntenta manna finas sa prèside Mereu: “custu giòvanu faghet onore a totu sa bidda, est unu pitzinnu de remeju, educadu, istudiosu e sèriu. Dae annu passadu l’amus bidu comente est intradu in sas istafetas chi currende fiat particulare, e dae cue est cumentzadu totu”
E como Orgòsolo podet festare su campione suo.
