S’opinione subra su manìgiu chi faghet s’Itàlia de sas limbas de minoria suas est pronta. L’ant iscrita sos espertos nominados dae su Cussìgiu d’Europa e intregada a sos resposanbiles de su dipartimentu de sas minorias natzionales in Istrasburgu su 16 de Sant’Andria coladu. Como, a pustis de sa tradutzione in frantzesu (sa segunda limba ufitziale de su Cussìgiu d’Europa) su documentu, chi est galu segretu e cunfidentziale, at a èssere imbiadu a su Guvernu italianu.
Sa publicatzione est prevèdida facas a su mese de maju o làmpadas 2016, sende chi su gabinetu italianu at 4 meses a disponimentu pro controire sas osservationes de sos espertos europeos incarrigados de averguare si sa Repùblica Italiana adduit a sas normas de sa Cunventzione de Protetzione de sas Minorias Natzionale. Custu tratadu internatzionale, a su cale s’Italia at aderidu ufitzialmente cun ratìfica de su Parlamentu, òbligat a rispetare unos cantos deretos de sas minorias presentes in su territòriu. Sa Sardigna est una de custas populatzione tuteladas chi depet èssere amparada fintzas in sa limba.
Su guvernu italianu est obligadu a imbiare unu raportu a su Cussìgiu d’Europa (chi diat èssere unu paru de Onu europea) cada 3 annos. Ma s’ùrtima relata imbiada in su 2014 l’at atentzionada su Coordinamentu pro su Sardu Ufitziale (organizatzione rapresentativa de su movimentu linguìsticu sardu) chi at piscadu unas cantas cosas chi no andaiant bene. A bisu de su CSU, s’Itàlia fiat meda otimista a descrìere sa situatzione de sa limba sarda, chi contaiat ispantos a s’Europa mentre totus ischint chi in Sardigna su sardu est galu una limba discriminada.
Dae inoghe si sunt mòvidas sas abbas. Su Cussìgiu de s’Europa at imbiadu, s’istade colada in Roma, pro intèndere su parre de sos rapresentantes de sas minorias linguìsticas, unos canto espertos-ispetores. A dae in antis de su comitadu de “ispetores” europeos (cumpostu dae da Krzysztof Zyman, Reinis Aboltinis, Craig Oliphant e Carmen Santiago-Reyes), in una die prena de addòbios, istùdios e traballos fungudos, si sunt presentados sos rapresentantes de su Csu, in sa persone de Giuseppe Pepe Coròngiu.
Su comitadu de espertos, sende chi su chi s’est naradu est partu bene argumentadu, at dadu incarrigu a su CSU de presentare intro de su mese de Cabudanni de ocannu una relatzione iscrita subra totu sas fartas e sas mancàntzias de Roma in contu a sa limba sarda in sos ùrtimos deghe annos. Relata chi su CSU aiat imbiadu a Istrasburgu e presentadu publicamente in Òschiri sa die de sa Festa de sa Limba Ufitziale.
Como sa “denùntzia” de Coròngiu e de su CSU at camminadu e est de seguru intrada in s’ammonestu chi su Cussìgiu de s’Europa at fatu a s’Italia. Ma tocat a isetare a s’annu chi benit pro bìdere ite at iscritu e ite at a respòndere su guvernu italianu a sos imputos de su Coordinamentu pro su Sardu Ufitziale.
In beranu l’amus a ischire…s’ierru at a colare
Leave a comment