B’est fintzas su sardu in mesu de sas 4 limbas minoritàrias europeas isseberadas pro su progetu “The Digital Language Diversity Project” (DLDP, in sardu “Progetu Digitale pro sa Diversidade Linguìstica”), coordinadu dae Ilc-Cnr, chi at incaminadu in custas dies dae Donòstia (tzitade de su Paisu Bascu) sa prima fase de una chirca subra de sos bisòngios digitales de sas limbas prus pagu ispainadas in Europa. Chircadores e istudiosos, difundende unos cantos cuestionàrios in mesu de sas populatziones, ant a chircare de cumprèndere sa calidade e sa cantidade de s’impreu digitale de bascu, brètone, carelianu e sardu, chirchende fintzas de cumprèndere sos bisòngios de sos faeddadores pro su chi pertocat s’isvilupu de tecnologias e aparatos in su setore.
Lu faghet ischire in Sardigna s’organizatzione “Coordinamentu pro su Sardu Ufitziale”, chi at dadu a sos istudiosos de su “Centro Nazionale per le Ricerche” suportu logìsticu e unu seervìtziu de tradutzione de su cuestionàriu dedicadu a sos sardos, chi l’ant a sumministrare no in italianu ebbia, ma fintzas in Limba Sarda Comuna. Su tradutore est s’espertu nugoresu de limbàgios tècnicos Sarvadore Serra.
Sos resurtados de sa chirca ant a servire a detzìdere comente dare a custas limbas su suportu digitale che nde tenent bisòngiu, in sa forma de unu “Digital Language Survival Kit” (“Echipagiamentu Linguìsticu Digitale de Supravivèntzia”), est a nàrrere una sèrie de racumandatziones pro promòvere s’impreu digitale de sas limbas minoritàrias. Sos àteros cumpàngios de su progetu sunt “European Language Equality Network” (ELEN, FR), “Elhuyar Fundazioa” (ELH, SP), “Johannes Gutenberg Universität Mainz – Forschungs – und Lehrbereich Sprachen Nordeuropas und des Baltikums” (JGU-SNEB, DE), e “Karjalan Kielen”, Seura (KKK, S).
<Sa chirca rapresentat su primu istùdiu in assolutu de sos bisòngios digitales de sos faeddadores de sas limbas minoritàrias – at craridu Claudia Soria de s’ “Istituto di Linguistica Computazionale” de su “Consiglio Nazionale delle Ricerche”, responsàbile de su progetu finantziadu cun su programa europeu Erasmus + – e at a dare a su mundu de sa chirca e de s’indùstria una visione dettalliada de su chi sas organizatziones de base e sas comunidades linguìsticas pessant chi siat netzessàriu pro agiuare sas limbas issoro in s’isfera digitale>.
Su progetu, in prus, at a isvilupare una “Road Map for Digital Language Diversity” (“Mapa de su Caminu pro sa Diversidade Linguìstica Digitale”), chi punnat a fàghere a ghia a sos detzisores polìticos e a sos isvilupadores in su caminu de fàghere pro bogare a campu ainas digitales chi agiuent in sa revitalizatzione de sas limbas prus pagu impreadas e chi sunt arrischende de si nche mòrrere.
<Est importante chi su sardu siat una de sas 4 limbas isseberadas – at naradu Giosepe Coròngiu, rapresentante de su CSU- ca custa atentzione agiuat a amparare sa limba nostra (una cosa chi, a s’ispissu, la ponent in duda pròpiu in Sardigna). Est importante fintzas chi sa Limba Sarda Comuna siat un’istrumentu de chirca in custu traballu pro fàghere cumprèndere a sa classe dirigente nostra su profetu de s’istandardizatzione>.
Su “Coordinamentu pro su Sardu Ufitziale” cramat sos aderentes e sos simpatizantes a leare parte in s’indàgine incarchende in custu ligàmene.
https://docs.google.com/forms/d/1j24_rUOG6cgwLkgo8PyAIMzwiEeWkZQK6KXexap4t-k/viewform?c=0&w=1
Pro s’assemblea diretiva CSU
Casteddu, 10 de trìulas de su 2016
Leave a comment
Ma cando mai si potet intender una cosa goi: cando nanchi b’at una mancantzia legislativa de ateru in Sardinna, tando nanchi suprit sa leze natzionale italiana: como si su Sardu est riconnotu in sa Costitutzione Italiana non balet po su collegiu Europeu. Ma sa Costitutzione est, purtroppo, superiore peri a s’Istatutu Sardu e tando, in custu casu, depent picare cussu riferimentu po nos dare custu beneitu collegiu Sardu. O no?