A dolu mannu, gasi est. Su guvernu de sa Sardigna, galu in antis de comintzare, est giai treme treme. Dimissiones, murrùngios, brigas e protestas. Su segretàriu de sos “Rossomori” chi si dimitit ca, narant, ant postu Elisabetta Falchi che Assessore a s’Agricultura sena chi issu esseret de acordu. Murrùngios duncas pro mancàntzia de democratzia in intro de su partidu, cun Gesuino Muledda, su presidente, chi diat àere detzisu sena ascurtare sas ideas de sos àteros dirigentes. Su motivu de sas brigas diat èssere ca in su curriculum polìticu de s’Assessora noa b’at una presèntzia sua in partidos cun ideas non pròpiu a làcana cun sas de sos sovranistas.
Pagu prus o mancu su chi b’at capitadu in intro de SEL, cando una minoria interna (narant ghiada dae Michele Piras) no at agradèssidu su sèberu de bi pònnere in s’Assessoradu a sa Cultura Claudia Firinu – sèberu fatu dae una majoria chi diat èssere ghiada dae Luciano Uras – semper pro su passadu polìticu suo. Pro abarrare in s’arresonu de Firinu: b’at una parte manna de gente chi est isetende sas primas intervistas e decraratziones pro ischiret su pensu suo in pitzu a su setore culturale in Sardigna dae inoghe a chimbe annos: programma e progetos, ma mescamente sas fainas chi cheret dimprire. E pro su chi pertocat su setore de sa limba sarda b’at de nàrrere chi paritza gente est isetende unu pagu cun timòria sas fainas suas, ca a nde ghetare su fràigu fatu in sos ùrtimos annos non mi cheret meda. Diat èssere torrare a in segus de nessi bìndighi annos.
Pro agabbare tocat a ammentare chi sas dies coladas sa Manca Sarda-Italiana (Pdci e Rifondatzione) at iscritu una lìtera a Pìgliaru pro protestare ca no ant tènnidu rapresentàntzia in sa Giunta Regionale.
Cando su ballu de cadreas at a agabbare amus a bìdere fintzas carchi faina polìtica: semper chi sos ricursos de sos candidados contra a sa lege eletorale sarda non fatzant brullas malas a su guvernu e a sos sardos.