de Angelo Canu 
Dae custu mangianu est ufitziale sa presèntzia de sa limba sarda in su festival de Venètzia, pro more de Fred Film Radio, unu progetu europeu aprontadu dae una “ràdio web”, in collaborazione cun sa Regione Sardegna, sa Fondazione Sardegna Film Commission e s’Ufìtziu de sa Limba Sarda de sa Regione Sarda.
Sa Fred Film Radio, est una ràdiu multilìngue e multicanale nàschida pro contare de sos festival de su tzìnema, mescamente de s’indipendente, e si presentat a su Festival de Venètzia cun 29 canales in sa retza chi ant a faeddare in 25 limbas e unu de custos at a trasmìtere in sardu.
Pro sa prima borta una limba minoritària, su sardu, est istrangiada (e duncas reconnota) in su festival che a una limba normale, paris cun s’inglesu, su tedescu, su giaponesu, su tzinesu, s’arabu e gai a sighire.
Pro esseret ammìtidu e pro cromperet a custu puntu teniat bisòngiu de unu istandard: difatis sa prima pàgina de su canale in sardu est iscritu in Limba Sarda Comuna, s’istandard seberadu dae sa Regione in su 2006.
“Su primu canale FRED dedicadu a una limba minoritària.
Ses un’amantiosu de tzìnema / regista / atore / crìticu tzinematogràficu / giornalista / istudiante de tzìnema / organizadore de fèstival / produtore / distribudore / buyer / agente / ufìtziu istampa / o ses petzi un’amantiosu de sos film indipendentes e de sos fèstival de tzìnema?
Ses in su logu giustu.
Sa punna de FRED est sa de permìtere a chie diat chèrrere èssere in cue ma non podet, de si godire s’àera chi si respirat in unu fèstival de su tzìnema: ma finas chie at àpidu sa bonasorte de bi èssere at a agatare informatziones prus fungudas subra su chi b’at capitende.
Si su sardu est sa limba tua, custu est su canale chi ti deghet.”
A nos nàrrere sos contos, sas allegas, ma fintzas pro nos contulargiare sos pispisos de su festival at a èssere Mariantonietta Piga, operadora de s’Ufìtziu de sa Limba Sarda de sa RAS.
Leave a comment