Un’àtera nova bona pro sa limba sarda: su Manifestu de Girona pro sos Deretos Linguìsticos est dae pagu tempus fintzas in limba sarda, paris cun àteras 63 limbas,in sa pàgina de su PEN Catalanu, sezione de su PEN International.
Moende dae una tradutzione chi aiat fatu Nanni Falconi, Giagu Ledda l’at revisada, e de acordu cun isse si sunt postos in cuntatu cun su PEN Catalanu, pro fàghere a manera chi esseret publicada in su situ.
Est unu passu a in antis de importu non pro su reconnoschimentu internatzionale de sa limba sarda ebbia, cantu prus che àteru pro s’àrchidu de sa limba matessi a sos ogros de sos sardos, ca la ponet a pare a àteras limbas in sa normalidade sua.
Custos sunt sos deghe puntos de su Manifestu:
1. Sa diversidade linguìstica est unu patrimòniu de s’umanidade chi devet èssere apretziadu e amparadu.
2. Su rispetu pro totu sas limbas e culturas est de fundamentu in sa costrutzione e in su mantenimentu de su diàlogu e de sa paghe in su mundu.
3. Onni pessone imparat a faeddare in su sinu de una comunidade chi li dat sa vida, sa limba, sa cultura e s’identidade.
4. Totu sas limbas e faeddos vàrios non sunt ainas pro relatare ebbia; sunt finas s’ambiente sotziale in ue creschent sas pessones e si formant sas culturas.
5. Onni comunidade linguìstica tenet su deretu a chi sa limba sua siat impitada comente limba ufitziale in su logu suo.
6. S’imparamentu iscolàsticu devet agiudare a acrèschere su prestìgiu de sa limba faeddada dae sa comunidade linguìstica de su logu.
7. Diat èssere pretzisu chi sos tzitadinos tèngiant una connoschèntzia generalizada de unas cantas limbas, ca custu favoressit s’empatia e s’abertura intelletuale, e a su matessi tempus contribuit a una connoschèntzia prus aprofundida de sa limba pròpia.
8. Sa tradutzione de testos – a manera particulare sas òperas mannas de culturas diferentes – est un’elementu de importu mannu in su protzessu netzessàriu de prus connoschèntzia e rispetu intre sas pessones.
9. Sos mèdias sunt isparghinadores privilegiados pro fàghere efetiva sa diversidade linguìstica e pro li dare prestìgiu cun cumpetèntzia e rigore.
10. Su deretu de impitare e amparare sa limba pròpia devet èssere reconnotu dae sas Natziones Unidas comente unu de sos deretos umanos fundamentales.
Pro iscarrigare su manifestu intreu: http://www.pencatala.cat/documents/sard.pdf