B’at unu pagu de persones chi pensant chi pro su tempus benidore de sa limba sarda, e duncas finas pro sa polìtica linguìstica chi pertocat sa limba sarda, siat fundamentale sa bidda de Casteddu: a pitzu de custa chistione unu podet o non podet èssere de acordu, ma est seguru chi, nessi pro unu datu numèricu lìmpiu, chi est su de sa gente chi istat, o travigat in Casteddu, sa bidda prus manna de sa Sardigna est a beru de importu mannu pro sa chistione de sa polìtica linguìstica sarda.
E unu passu in antis in sa Comuna de Casteddu l’ant fatu in custas dies.
Difatis ant aprovadu su Regulamentu nou de su Consìgiu Comunale de Casteddu, presentadu dae su Presidente Goffredo Depau, e dae Pepe Andreozzi e Lisandru Vargiu.
In mesu de sas àteras noas chi proponet custu pabiru bi nd’at una chi pertocat sa limba sarda, ca dae como in susu so Cussigeris Comunales de Casteddu, “podent impreare sa limba sarda non petzi in sas sètzidas de su Consìgiu, o in sas cummissiones, finas per iscriptum, pro presentare propostas de deliberatziones, emendamentos, motziones, òrdines de sa die”.
Una noa de importu mannu, chi permitet duncas de bìdere sa limba sarda semper prus normale, mescamente pro àere fatu a manera chi sa limba siat finas iscrita, e chi nch’essat dae sas làcanas de s’oralidade finas in sas istitutziones, finas in sas tzitades prus mannas de Sardigna.
de Jorgi Rusta