Amus intervistadu a Ornella Demuru, de Progetu Repùblica de Sardigna, giai segretàriu de s’iRS e candidada a sìndigu pro ProgReS in sas ùrtimas comunales in Casteddu pro sa chistione chi at azeradu sa Giunta Regionale.
SARdies: Ite nde pensas de sas ‘cuotas rosas’?
Ornella Demuru: B’at unu problema de tèrmines. Deo ispero chi siat una batàllia cuotidiana. Depimus usare custa terminologia trista, ‘cuotas rosas’, cando in sos paisos nòrdicos faeddant de cuotas de gènere. Sas cuotas de gènere nche colant sa chistione feminile. Sunt fundamentales. Sa prova est in sos paisos nòrdicos in ue 20 o 30 annos a como su feminismu cun batàllias de trintzea at otentu resurtados chi como si bident. In Isvètzia si pensat addiritura a sas cuotas maschiles. Semus firmos a s’idea chi a sas fèminas no las votant ca non balent. Est su livellu de sa sotziedade e de unu’istadu intzivile. Est una sotziedade maschilista pro totu. Abaidende sos traballos de su cussìgiu regionale, b’at òmines in totue, intre sos giornalistas puru. Non b’at una rapresentatzione reale de sa sotziedade.
S: Duncas crees ca su ricursu a su Tar siat istadu giustu?
D: Deo so andada a sas riuniones pro lu preparare e no apo acudidu a firmare ca fia in Berlinu pro un’addòbiu polìticu. Cheriat èssere una batàllia trasversale. Oe paret una batàllia de su tzentrumanca. In sas riuniones in Tramatza bi fiant petzi fèminas de su tzentrumanca e de s’iRS, ca deo tando fia segretàriu de s’iRS. Non penso chi su tzentrumanca siat prus acanta a sas chistiones de gènere. Su problema no est ca sunt sos òmines chi non ti lassant fàghere sas cosas, su chi mancat est una retza intre nois. A pustis de sa vitòria de su ricursu pro sa Giunta de Roma fia otimista. Sas fèminas parimus pandas. Non podet èssere su Tar a torrare a istabilire sos ecuilìbrios sotziales. Apo fundadu Fed’S, Fèminas de Sardigna, cun custu iscopu, dia chèrrere chi si elàboret una polìtica a su feminile. Bi cheret unu traballu intre sas fèminas, in polìtica e nono.
S: Non crees chi custu siat un’atacu a sa meritocratzia?
D: Sa de sa meritocratzia est un’iscusa. B’at dificoltade a s’afirmare. Pro una fèmina est traballosu. Est unu momentu chi paritzas fèminas sunt in su guvernu italianu pro sos raportos cun su presidente de su Cussìgiu e nche colamus nois puru. Sa meritocratzia in Itàlia no esistit. Chi si nde faeddet cando si faeddat de fèminas ebbia est grave.
S: Ma non pensas chi sas fèminas siant prus pagu interessadas a sa polìtica?
D: Eja. Ca sas fèminas sunt cuncretas e prus sintzeras e sunt acusadas de èssere o polèmicas o istèricas. In unu sistema maschile o rinùntzias o ti ìsulant. Depimus fàghere in modu chi sa polìtica feminile diat su cuntributu suo. Pro nàrrere, in sas eletziones provintziales de Casteddu Angela Quaquero at fatu unu traballu de primore: pro ite no ant candidadu a issa a sa presidèntzia in parte de Graziano Milia? Meritaiat, no l’ant cunsiderada, non cherent cussu tipu de polìtica. Sos paisos nòrdicos sunt avantzados e dipendet dae custu puru. Inghe cando ses pitica ti dant una pupia e ti faghent crèere ca a manna s’ocupatzione tua at a èssere cudda. Tenimus una cultura chi no imparat a sas fèminas a faeddare in pùblicu e pro fàghere polìtica depes faeddare. In Fed’S pro nàrrere sas fèminas depent gestire sas initziativas issoro e depent faeddare in pùblicu.
S: Ite depet fàghere como sa Giunta?
D: Rispòndere. Non depet èssere una risposta a su Tar, tenimus su deretu a èssere rapresentadas. S’universu feminile cheret rapresentadu. Su feminismu at fatu s’errore de pedire s’ugualàntzia: semus diferentes. Si custa diferèntzia no essit a pìgiu b’at una sotziedade tzopa. Pro bìdere si una sotziedade est tzivile depes andare a bìdere comente sunt tratadas sas fèminas.
S: Una pregonta subra de sa situatzione politica atuale: vertèntzia intradas e Tirrenia.
D: Sa situatzione est grave. Sa classe polìtica autonomista non nche renesset a arribbare a s’unidade. S’ingiùliant pare pare neghe de personalismos e sos ùnicos chi bi pranghent sunt sos sardos. Deo aprètzio su chi at fatu su guvernu Cappallacci cun sa flota sarda, chi fiat un’idea nostra. A fortza de insìstere semus otenende resurtados sena guvernare. Finas su fatu de sa tèssere torrada a su PdL est unu gestu simbòlicu pro ammentare ca tenent su dovere de rispòndere a sos sardos. Pro su restu, non b’at comunicatzione intre sas partes. Deo prerèrgio a usare su tèrmine minoria e no opositzione. Non creo chi sa parte minoritària de sos sardos chèrgiat chi si firmet totu e perdimus su dinari. Est ca in Sardigna si sèberat de fàghere opositzione pensende a sos interessos de parte.
Leave a comment