de Mauro Piredda
Parallelismos. In unu cungressu de cale si siat partidu, chi serbit a definire una lìnia polìtica e a mudare o a mantènnere su grupu dirigente uscente, b’at semper unu documentu chi podet èssere rapresentativu de totu sa dirigèntzia, o chi rapresentat petzi sa majoria. E tando sa minoria ite faghet? Podet èssere contrària a totu su chi b’at iscritu (ca lu ritenet una “callonada”) e tando nde isterret un’àteru a porfia. S’in casu s’opositzione non siat totale, custa minoria podet ricùrrere a “emendare” su documentu printzipale. A la nàrrere totu canta non semus nemmancu faeddende de una minoria ma de una chedda de gente chi, mancari chi cun carchi diferèntzia, si movet in intro de sa guarnissa de cussu documentu. Reconnoschende·lu.
E tando, mancari chi su movimentu linguìsticu non siat unu partidu, si unu est pro “emendare” sa Lsc, la devet impreare cun sas mudas chi ritenet oportunas. Finas pro las acrarire a sos chi devent èssere cumbintos de sa bonidade de sa proposta sua. Ca si nono, de ite semus faeddende? Su de no l’impitare proponende a su matessi tempus àteros bator o chimbe annos (cando non binti) de istùdiu, cheret nàrrere a nche furriare totu su traballu chi est istadu fatu cara a un’àtera e alternativa impostatzione. Positzione legìtima, ma bastat de lu nàrrere sena imbòligos. Ca comente naraiat un’òmine mannu de sa terra nostra, “sa beridade est semper revolutzionària”.
In fines: pro ite calicunu non si leat petzi un’annu (non bator o chimbe) de istùdiu ponende·si a pregontare a sos “cabesusesus” cantu est “setentrionale” sa Lsc? At a otènnere resurtados impressionantes!