de Anzelu Canu
Su 18 de martzu est arribada sa nova chi sos sardos fiant timende: a pustis de duos annos de isperimentatzione ocannu sa flota sarda no at a navigare su Tirrenu pro dare unu servìtziu a sos Sardos mescamente e a sos turistas a pustis.
“Non si podet torrare a ativare su servìtziu ca non bi l’acudimus pro motivos tècnicos” at naradu Capellacci. Ma ite sunt sos motivos tècnicos? Ocannu a pustis de duos annos de gestione de sa Saremar deviat intrare sa “Flota Sarda SPA”, una sotziedade de sa Regione Sardigna cun prus de 10 milliones de euros de pòdere gastare pro sos trasportos, chi at àpidu s’aprovatzione (unu pagu ispantosa pro totus!) de su guvernu Monti, ma chi est galu isetende s’aprovatzione de sa Commissione Europea. A dolu mannu sena su placet de s’Unione Europea sas naves sardas no ant a pòdere biagiare e duncas no ant a pòdere garantire unu servìtziu mescas a sos Sardos e a sos turistas a pustis. Custu at a fàghere a manera chi amus a pèrdere bona parte de sos deretos chi amus pro remediare a sos difetos de s’insularidade.
Capellacci at fintzas chèrfidu annànghere chi s’at a chircare de“fàghere de totu pro liberare sa Sardigna dae sas cadenas ruingiadas de sos meres de su mare, dae sos atacos de sos chi ant s’impudu de sa Tirrenia e dae unu Istadu tzentralista”, chi ant s’interessu de mantènnere sa Sardigna in una conditzione de insularidade.